Претходен број

Поглед

Црвен картон од ЕУ

 Слободанка Јовановска

Посетата на претседателот Бранко Црвенковски во Брисел потсети на некогаш популарната радиоемисија „Деновиве пред години“. Тој пред комесарот Оли Рен и пред генералниот секретар на НАТО, Јап де Хоп Шефер, вети цврста решеност на Македонија да ги исполни условите и најави дека ќе се удвојат напорите да се надомести тоа што беше пропуштено изминатите месеци.

Вакви цврсти решености и најави за удвоени напори којзнае колку пати даваа сите македонски функционери изминативе години, а списокот на реформи што ги бара ЕУ и натаму е долг и, што е најважно, цикличен. Откако направивме добри избори, го расипавме политичкиот дијалог, за да го поправиме, одржавме катастрофални избори, откако воспоставивме стабилно политичко лидерство, го бојкотиравме парламентот, а откако почна да работи парламентот, се расипа кохабитацијата, па сега се чекаат пак избори за да се поправи впечатокот за да го исполниме клучниот услов што, според Оли Рен, не е веќе политички, туку демократски за Македонија.

ЕУ неделава јасно и' покажа црвен картон на Македонија, правејќи ги беспредметни посакувањата три години по кандидатскиот статус земјата да добие датум за преговори за членство во Унијата. Политичка култура, нормален политички живот, стабилни институции и владеење на правото се четири стари препораки што сега одново ги бара Брисел, што покажува дека Македонија никако не успева да созрее политички.

Затоа станува патетична растрчаноста на македонските функционери во Брисел еден месец пред извештајот на ЕК во ноември, иако знаат дека изгледите да се добие датум до крајот на годинава се истрошија.