Детство во судски лавиринти - ќерката на Спаска уште е со таткото

Спаска Митрова во повеќе наврати не ги почитуваше решенијата на Центарот за одредување на начинот на гледање и не му дозволуваше на таткото да ја гледа ќеркичката

Гордана Дувњак

Четиригодишната ќеркичка на Спаска Митрова се' уште се наоѓа во домот на таткото Воислав Савиќ. Иако таткото пред нецел месец го изгуби старателството врз малечката Сузана, таа ќе остане кај него се' додека не стане правосилна пресудата на Основниот суд во Гевгелија и не заврши жалбената постапката. Одлуката беше донесена на 15 октомври, на новото судско рочиште иницирано од второстепениот суд во Скопје, кој ја прифати жалбата на контроверзната Бугарка од Гевгелија. Претходно гевгелискиот суд одлучи во корист на таткото, но Апелациониот суд го врати случајот на повторно одлучување, затоа што не било земено предвид психијатриското вештачење на двајцата родители.

„Пресудата ја слушнавме од медиумите, но се' уште официјално не сме ја добиле. Откако ќе ја прочитаме аргументацијата на гевгелискиот суд, ќе видиме по кои основи ќе ја оспориме пресудата“, вели гевгелискиот адвокат Васил Џинов, кој е правен бранител на Савиќ.

Тој е убеден дека неговиот клиент ќе се жали и ќе ја продолжи правната битка за враќање на старателството врз детето, која трае веќе три години. Адвокатот очекува пресудата да ја добие до 15 ноември, бидејќи 30 дена е законскиот рок во кој треба да биде напишана објавената пресуда.

Од Центарот за социјални работи во Гевгелија со внимание го следат овој случај, кој своевремено им предизвика големи проблеми и го доведе во прашање нивниот имиџ. Генезата на случајот „Спаска Митрова“ им е добро познат, бидејќи и покрај тоа што не станува збор за сложен случај, тој дополнително толку многу се искомплицира што дури доби и меѓународни размери.

„Пресудата не е правосилна и затоа детето е се' уште во домот на својот татко. Мајката и натаму не комуницира со нашата институција и сите дописи ги испраќаме преку нејзиниот адвокат Шпенд Деваја“, нагласува директорката на гевгелискиот Центар за социјални работи, Станка Петрова. Таа вели дека засега гледањето на детето од страна на мајката се одвива нормално и без проблеми. Детето е кај неа секој втор викенд во месецот. Го зема во петок директно од градинка, а го враќа на истото место во понеделник. Но, како што велат од Центарот, и натаму мајката одбива да плаќа алиментација, која изнесува 2.000 денари.

Директорката на Центарот го познава во детали конкретниот случај, бидејќи на него работела и како правник. Не крие дека во Центарот се разочарани од ваквиот развој на настаните, бидејќи и покрај тоа што ја знаат целата генеза на овој предмет, судот не го уважил нивното мислење.

„Центарот за социјални работи е ставен во средиштето на родителскиот оган, а неговата улога во судската постапка е целосно маргинализирана“, уверува Петрова. Таа потсетува дека нивната улога е да им ги обезбедат на двајцата родителските законски права, но најважна од се' е нивната улога во заштита на детето.

Спаска Митрова во повеќе наврати не ги почитуваше решенијата на Центарот за одредување на начинот на гледање на детето и не му дозволуваше на таткото да ја гледа ќеркичката. Поради непочитување, пак, на судските одлуки, Митрова лани во август беше и на издржување затворска казна од три месеци во затворот во Идризово. Тоа предизвика големи реакции во бугарската јавност, која ја обвини македонската држава за дискриминација и од овој случај направи политички проблем во европските институции.