Поглед

Северина во еден здив

Катерина Шекеровска

Уште долго ќе се раскажува и ќе се прераскажува за концертот на хрватската ѕвезда Северина во Скопје. Фантастично тричасовно шоу, по кое занемеа и најголемите нејзини душегрижници. Контроверзна, оспорувана, коментирана, критикувана, со сите свои доблести и мани, Северина во саботата вечер во полната сала „Борис Трајковски“ им одржа лекција на своите колеги, објаснувајќи им како навистина се прави концерт. И како може цели три часа, од почеток до крај, да минат во еден здив.

Северина на скопската публика и' приреди спектакуларен настан, шоу осмислено до последниот детаљ, провокативно, доведено до перфекција. Се пресоблекуваше безброј пати, кокетираше со публиката, имаше совршено сценарио во кое и паузата за преслекување минуваше со насмевки на лицата... Беше жртва на насилство во спотот за „Мушкарцу треба само курва“, го „симна“ Мајкл Џексон, и' „врати“ на Даниела Мартиновиќ, запеа во „дует“ со Оливер Драгоевиќ, облече маичка со натпис „Го сакам Скопје“, висеше на лулашка...

Покажа дека знае одлично и да глуми и да танцува (на моменти подобра и од танчерките), да пее, да раскажува, да провоцира... Има хитови за кои многу пејачи можат само да сонуваат. Го има и Горан Бреговиќ, кој допатува специјално во Скопје, но остана во нејзина сенка...

По сето она што го видовме во „Борис Трајковски“, останува само уште едно прашање: Постои ли нешто што не знае да прави Северина?

Со последниот концерт во Скопје покажа дека е комплетен и одлично спакуван производ. Се' во свое време и на свое место. Мудро размислува за секој свој нареден потег, без притоа да и' препушти што било на случјноста. Или што би рекла една пријателка, ретка ѕверка. Кога само би имале можност во земјава да гледаме повеќе ѕверки и ѕверови како што е таа.