ЕУ се закани со враќање на визите

За да ја спречи злоупотребата на безвизниот режим, Брисел, ако треба, ќе ги употреби сите можни механизми

Тамара Грнчароска

ЕУ вчера ги предупреди Македонија и Србија дека може да го активира механизмот за укинување на безвизниот режим доколку и натаму се злоупотребува укинувањето на визите од страна на Брисел, како што беа азилантските бранови од двете земји во земји-членки на Унијата.

Предупредувањето дојде во пакет со укинувањето на визите за Албанија и за Босна и Херцеговина, со објаснување дека искуството што го има ЕУ со укинувањето на визниот режим за Македонија и за Србија покажало дека е потребна претходна кампања за либерализацијата и поголем мониторинг околу тоа како се спроведува и дали се злоупотребува.

На вчерашната прес-конференција еврокомесарката за внатрешни работи, Сесилија Малстром, и претседавачот од Белгија Мелкјор Ватле, изјавија дека неколку земји побарале контрола на безвизниот режим и ако една или две од нив во иднина се почувствуваат загрозени и побараат мерки, одговорот може да биде и повторно воведување на визите.

Според нив, тоа го овозможува член 78 од Лисабонскиот договор, според кој таквата промена на шенгенскиот режим е можна во вонредни ситуации. „Сакаме да ви укажеме какви можат да бидат консеквенциите од злоупотребата на укинувањето на визите“, порача белгискиот министер за азил, додавајќи дека во основа ќе се искористат сите можни механизми што ги дава регулативата на ЕУ, иако целта не е овој процес да се проблематизира, туку да се одвива лесно. Според Мелкјор и Ватле, визната либерализација мора да биде успех и мора да се искористи за вистински цели, а не за да се бара работа во земјите-членки на ЕУ или азил.

Извори од Македонија вчера нагласуваа дека мерките што ги промовира ЕУ нема да се однесуваат само за нашата земја и дека контролниот механизам на министрите за правда и за внатрешни работи на ЕУ усвоен вчера нема да донесе никакви промени во однос на тоа што се правеше досега од страна на Европската комисија.

„Во декларацијата само ќе бидат поапострофирани мерките што се применуваа досега, појасно ќе биде дефиниран начинот на вршење на транзитот од земја која не е во шенген-зоната во земја од шенген-зоната и слично“, наведуваат нашите извори. Според нив, за Македонија и за нејзините граѓани нема да има никакви дополнителни контролни мерки.

Од македонското МНР вчера го потврдија тоа, наведувајќи дека во јавноста се појавиле голем број шпекулации што ќе значат контролните мерки, кои во суштина се применуваа и досега. Тие наведуваат дека Македонија и досега доставувала редовни извештаи до ЕК за спроведувањето на визната либерализација, во рамките на заложбите и обврските што ги имаме преземено со Договорот за стабилизација и асоцијација. Во МНР тврдат дека оцените се оти нашата земја ја спроведува визната либерализација како што треба и дека на појавените проблеми, како што беше азилантскиот бран, земјата навремено реагирала со проактивни мерки.

„Македонија веќе има свој мониторинг-механизам за имплементација на визната либерализација. Разменуваме информации и директно соработуваме со ЕК и земјите-членки под капата на Договорот за стабилизација и асоцијација“, ни изјави портпаролот на МНР, Борче Стамов.