Здравствената каса нема пари, ама не е во банкрот

За идната година ФЗО успеал да се избоксува за 353 милиони евра, најмногу досега

Здравствената каса нема доволно пари, но не е во банкрот, тврдат здравствените власти. Напротив, Фондот за здравствено осигурување (ФЗО) за идната година ќе добие повеќе пари, но како и секоја година, тие не се доволни зашто трошоците постојано се зголемуваат, како за лекови, така и за боледувања и други расходи. Фондот за 2011 година успеал да се избори од Владата за 70 отсто од бараните средства, односно од 365 милиони евра, колку што Фондот барал пари од Владата за следната година, одобрени се околу 353 милиони евра, колку што е и' во предлог-буџетот. Фондот има практика секогаш кога преговара за буџетот со Владата да оди со најцрните сценарија за на крај да добие речиси колку што му треба. Едно од тие сценарија е и тоа што беше објавено во јавноста, но анализата е стара и е од летоска, пред донесување на ребалансот на буџетот за оваа година.

„Во август беше направена една сеопфатна анализа како платформа за почнување преговори со Министерството за финансии за буџетот за 2011 година. Но, од анализата се извадени од контекст одредени селектирани реченици“, тврди директорката на Фондот за здравствено осигурување, Маја Парнарџиева-Змејкова, која додаде дека во јавноста не треба да се создава паника.

За првиот фондовец, најбитно е што Фондот годинава обезбеди согласност од Владата за постојано зголемување на здравствениот буџет. „Првиот резултат беше ребалансот на буџетот за 2010 година со дополнителни 16 милиони евра, а вториот ефект е предлог-буџетот на Фондот за 2011 година со дополнителни 21 милион евра. Историски гледано, предлог-буџетот за 2011 година на Фондот ќе биде највисок досега и ќе изнесува 353 милиони евра“, додаде Парнарџиева-Змејкова.

Во 2006 година буџетот на ФЗО беше околу 260 милиони евра, во 2009 година околу 310 милиони евра, а годинава околу 330 милиони евра.

Но, за Фондот и натаму е проблемот на собирање средства по основа на здравствениот придонес. Директорката Парнарџиева-Змејкова призна дека овие средства не се постојани, односно нивниот прилив е цик-цак, два месеца може да се намалува приливот, а третиот месец да се движи по нагорна линија.

И покрај тоа што се најавуваат различни апокалиптични сценарија за здравството, министерот за здравство Бујар Османи е категоричен дека во овој сектор суштинските реформи се спроведуваат. „Моментално се спроведуваат проекти од стотици милиони евра и сите тие приказни за колапс на здравството се неточни“, потенцира министерот Османи упатувајќи порака до здравствени работници, како и до пациентите и граѓаните да останат спокојни. (Ј.Ј.)