Со формална превенција нема здрави заби

Во стоматолошките ординации се спроведува формална и лоша превенција на забите, што доведува до развој на кариес и парадентоза во голем процент. Затоа за лекување на забите се трошат далеку повеќе пари отколку што би се потрошиле за превентива на оралното здравје. Стоматолозите работат со застарена и дотраена опрема и се недоволно екипирани, а капитацијата со која се плаќаат е нереална. Стоматолошкиот клинички центар се задушува во превработеност, а секоја година се продуцираат по околу 400 нови стоматолози, што е резултат на нереална и префорсирана кадровска политика. Ова се само дел од проблемите со кои се соочува македонската стоматологија, кои ги обелодени претседателот на Стоматолошката комора д-р Марија Накова, промовирајќи ја стратегијата за развој на стоматологијата во следните десетина години.

Според неа, приоритет треба да биде промоцијата и превенцијата на оралното здравје, планираната кадровска политика, како и финансирањето на стоматологијата. Минималниот пакет стоматолошки услуги, како што рече д-р Накова, се проценува на околу 68 милиони евра, а за тој да биде спред европски терк, потребни се околу 113 милиони евра. Доколку секој појде само еднаш на стоматолог во годината, потребни се околу 25 милиони евра, а сега никој не знае колку проценти од здравствениот придонес одат за стоматологијата.

„Никој не бара мораториум за Стоматолошкиот факултет, но бројот на студенти мора да се ограничи за да се добие квалитетен кадар“, додаде д-р Накова, која побара од министерот за здравство, Бујар Османи, и од првиот фондовец, Маја Парнаџиева-Змејкова, стратегијата да не остане само на хартија.

Станува збор за стратегиски документ што се носи првпат во Македонија и ја покажува визијата на стручната фела во однос на развојот на стоматологијата за наредните десет години. „Имаме документ во кој јасно е исцртано со бројки и букви каков е ставот на фелата, на Стоматолошката комора во однос на развојот на стоматологијата во иднина“, посочи Османи. (Ј.Ј.)