Тодоров решил да ги реновира сите училишта

Голем инвестициски проект за подобрување на училишната инфраструктура, најави вчера министерот за образование ,Никола Тодоров. Целта, според него, е да се реновираат сите училишта на територијата на државата. Реализацијата на проектот треба да почне идната година и да трае три-четири години.

„В година ќе почнеме еден од најголемите инвестициски циклуси во образовната инфраструктура во историјата на Македонија. Работиме на обезбедување средства од меѓународни извори. Целта е секое училиште во РМ да го реконструираме и да го направиме пристојно место за учење, работењ�� и престојување“ изјави Тодоров.

Според него, потребни се од 2,5 до 3 милијарди денари за средување на сите инфраструктурни проблеми во образованието. „Невозможно е сите инфраструктурни проблеми да бидат решени во една година. Во последните три-четири години се вложени 1,5 милијарди денари во образовната инфраструктура, што е трипати поголемо вложување во однос на претходниот четиригодишен период. Проблемите не се од денес, вчера или од пред две или пет години. Има училиштата што се стари и по 40-50 години, а во некои од нив никогаш немало поголеми вложувања“, рече Тодоров.

Тој вчера го посети најстарото училиште во земјава „Кирил и Методиј“ во општина Центар, кое доби нова електрична инсталација. УСАИД, преку проектот за основно образование ПЕП, вложи околу еден милион денари, а близу 1,3 милиони се средства на општината и на училиштето.

Успешното реновирање, со поддршка од проектот ПЕП на УСАИД, вчера пригодно го одбележа и ОУ „Војдан Чернодрински“ во Карпош, каде што беше сменет стариот и дотраен азбестен покрив и лесонитните плочки со нов еколошки пластифициран лим. Како што информира од Општина Карпош, вкупниот проект чини 4,4 милиони денари, од кои 3,2 милиони од Општината, а останатите од проектот на УСАИД. (П.Р.)