Бран намалувања на каматните стапки
Франкфурт - Европската централна банка вчера сосема неочекувано ја спушти клучната каматна стапка за 0,75 проценти, на 2,5 отсто. Ова, според западните агенции, е најголемо намалување на каматната стапка во последните десет години, односно од постоењето на ЕЦБ. Каматната стапка за еден процент, на два отсто, вчера ја намали и Британската централна банка. Сега стапката во Британија е на најниско ниво од 1951, односно од времето на Винстон Черчил.
Бранот намалување на каматните стапки го започна Шведска, која неочекувано, направи најголем рез на стапката од 1,75 проценти. Каматните стапки ги намалија и централните банки на Тајланд, Нов Зеланд и Индонезија. Банкарските експерти тврдат дека централните банки мора да бидат похрабри во сегашната криза, затоа што во спротивно рецесијата во најразвиените економии во светот ќе биде уште потешка и подлабока.
Според лондонски „Фајненшел тајмс“, доколку централните банки не интервенираат сега, ризикуваат до средината на следната година основната каматна стапка да ја сведат на нула.
Британската влада во меѓувреме соопшти дека подготвува програма за помош на сопствениците на станови и куќи, кои поради тоа што ја загубиле работата или имаат драстично намалени примања, повеќе не се во состојба да ги отплаќаат станбените кредити на банките. Околу 45 илјади сопственици на станови и куќи во земјата до крајот на оваа година може да останат без покрив над главата, затоа што банките може да им ги одземат. Извори во британските банки кои даваат станбени кредити велат дека доколку нешто не се преземе, бројот на оние Британци кои следната година ќе останат без своите станови или куќи може да достигне и до 75 илјади.
Канцеларката на Германија, пак, Ангела Меркел изјави дека финансиската и економската криза можат да се надминат само преку координирани активности на земјите од Европската унија. „Можеме да ги надминеме глобалните проблеми само со заеднички дејства“, рече Меркел. (Според агенциите) |
