Во железничка несреќа загинаа најмалку 200 луѓе
Неколку стотици луѓе беа повредени кога брз патнички воз налета и удри во товарен воз
ДОДОМА - Спасувачките екипи од Танзанија вчера се обидуваа да ги извлечат жртвите од железничката несреќа во која загинаа најмалку 200 луѓе, а властите ветија дека ќе се спроведе истрага во услови на загриженост дека билансот на жртвите би можел уште да се зголеми. Неколку стотици луѓе беа повредени кога брз патнички воз налета и удри во товарен воз. Луѓето заглавени во остатоците од вагоните повикуваа помош и десет часови по несреќата што се случи вчера во утринските часови, јави новинарка на Независна телевизија.
Спасувачите немаа соодветна опрема за да го пресечат извитканиот челик и да ги ослободат заглавените, јави новинарката.
„Гледано од далеку, како се поставени вагоните еден врз друг, би помислиле дека тоа е повеќекатна зграда“, рече премиерот Фредрик Сумае пред парламентот во Додома, откако го посети местото на несреќата. „Владата ќе организира истрага за да се открие причината за овој трагичен случај“, рече Сумаје во парламентот. Не е познато кога ќе започне истрагата.
Преживеаните опишуваа како патниците скокале од забрзаниот воз во очаен обид да преживеат кога машиновозачот удрил во полните вагони извикувајќи дека нема контрола врз возот со околу 1.000 патници. Медицински извори јавија дека билансот на жртвите е најмалку 200, но веројатно ќе се зголеми како што продолжуваат операциите за извлекување на телата од остатоците. (Си-Би-Ес) |
