Црна Гора повторно го избра Мило Ѓукановиќ
Мнозинството гласачи го дадоа својот глас за подобар живот и европска иднина, изјави старо-новиот премиер
Подгорица - Премиерот на Црна Гора, Мило Ѓукановиќ, објави убедлива победа на Демократската партија на социјалистите на вчерашните предвремени парламентарни избори.
„Коалицијата ’За европска Црна Гора‘, предводена од Демократската партија на социјалистите, ќе има од 47 до 49 пратеници од вкупно 81 пратенички мандат. Мнозинството гласачи го дадоа својот глас за подобар живот и европска иднина на Црна Гора“, истакна Ѓукановиќ.
Тој најави дека во најкус можен рок ќе формира одговорна влада, која ќе ги продолжи реформите со цел приближување на Црна Гора кон европските и евроатлантските вредности.
Претходно, политичкиот директор на Демократската партија на социјалистите, Предраг Секулиќ, изјави дека коалицијата на премиерот Мило Ѓукановиќ доби апсолутно мнозинство во црногорскиот парламент.
Тој наведе дека коалицијата „За европска Црна Гора“ во новиот парламентарен состав ќе има од 15 до 20 проценти повеќе мандати од досегашниот состав.
Според прелиминарните податоци на Центарот за мониторинг „За европска Црна Гора“, освои 49 пратеници, Социјалистичката народна партија - 15, Нова српска демократија - осум и Движење за промени пет пратеници, по еден мандат освоија и сите четири албански партии.
На вчерашните предвремени парламентарни избори во Црна Гора околу 500.000 гласачи избираат 81 пратеник од 16 политички партии и коалиции.
Според агенциите за испитување на јавното мислење, за коалицијата гласале 50 проценти од избирачите, за опозициската Социјалистичка народна партија - 16 отсто, за Нова српска демократија - осум, а за Движењето за промени гласале околу шест проценти. Најверојатно, другите партии не го поминале изборниот праг.
Официјалните резултати од изборите ќе бидат соопштени подоцна од страна на Државната изборна комисија. (МИА) |
