Обама патува во Лондон со 500 члена придружба
Лондон - Повеќе британски весници ја коментираат фантастичната придружба со која американскиот претседател Барак Обама ќе допатува на претстојниот самит на Групата 20 во Лондон.
Обама во британската престолнина ќе пристигне во придружба на 500 члена персонал, меѓу кои 200 члена на безбедносните и разузнавачките служби, шестмина лекари и екипа готвачи од Белата куќа. Неговата сопруга Мишел ќе носи осуммина членови од личниот персонал.
„Кога патува претседателот, патува и Белата куќа“, објасни еден официјален претставник на американската администрација.
Покрај бројниот персонал, Обама ќе ја има на располагање и својата официјална лимузина, позната под името „ѕвер“. Станува збор за специјално блендирано возило, направено од зајакнат челик, алуминиум и титаниум, кој однатре е целосно запечатен, со резервоари на кислород, така што може да го заштити претседателот дури и од хемиски или биолошки напад. Резервоарот за бензин е обложен со специјална пена која ја спречува можноста од експлозија при евентуален судир, а гумите се така направени да обезбедуваат сигурно возење дури и да се дупнати.
Возилото има и сопствено вооружување и топ со солзавец, како и резерви крв од крвната група на претседателот АБ.
Обама следната недела во Лондон ќе пристигне со сопствениот претседателски авион „боинг 747“ (Air Force One), кој е опремен и со фитнес-центар, а до центарот на Лондон ќе биде превезен со сопствениот супер обезбеден хеликоптер, познат како Marin One, пишуваат „Обсервер“ и „Сандеј тајмс“. |
