Јапонска агенција со позитивна оцена за кредитниот рејтинг на Македонија

Јапонската кредитна агенција ЈЦР (Јапан кредит рејтинг агенси) даде позитивна прогноза за кредитниот рејтинг на Македонија. ЈЦР ја оцени земјава со ББ+ , со стабилен изглед, односно ги потврди очекувањата на „Стандард и Пурс“ за одржување на актуелната кредитна способност во иднина.

Својата оцена, како што информира Министерството за финансии, Јапонската кредитна агенција ја заснова на резултатите постигнати со континуираните економски реформи на Владата, прудентната фискална политика и умереното ниво на задолженост, како и со намалувањето на дефицитот на тековната сметка и одржувањето на нивото на девизните резерви на четиримесечна покриеност на увозот. Прогресот на земјата е потврден и во контекст на евроинтеграцискиот процес и препораката на Европската комисија за добивање датум за преговори за членство.

„Јапонската кредитна агенција забележува и дека од земјите од Централна и од Источна Европа, Македонија е најмалку погодена од економската криза, токму поради успешното спроведување на соодветни мерки од Владата, помалата зависност од надворешниот долг и ниската изложеност на екстерните ризици.

Стабилниот кредитен рејтинг, како што се посочува во соопштението, е добар сигнал за странските инвеститори, влијае врз каматната стапка по која земјата зема заеми на кредитниот пазар, како и врз вкупниот економски и политички имиџ на Македонија. (МИА)