Државата ќе продава илјадници квадрати земја

Деспина Трајковска

До крајот на годинава државата на продажба ќе понуди илјадници квадрати земја. Планирано е да се отуѓат 23 атрактивни локации во неколку градови низ државава. Хотели, катни гаражи, стокатници, голф терени и мини гратчиња, се само дел од милионските проекти што е предвидено да се реализираат на парцелите.

Министерството за транспорт и врски во „Фајненшл тајмс“ и во домашните медиуми веќе објави оглас со кој потенцијалните инвеститори се информираат за продажбата. Јавните лицитации, пак, според најавите е предвидено да се одржат до крајот на годинава. Со оглед на досегашните искуства, доколку лицитациите бидат успешни во првиот обид, а имајќи ги предвид и роковите за уплата на парите и за потпишување на договорите за отуѓувањето, првите камен-темелници можат да се очекуваат најдоцна до почетокот на пролетта идната година.

Ако се остварат плановите за продажба на конкретните парцели, само во Скопје за неколку години ќе има дури седум катни гаражи и три нови хотели. Ќе се нудат локации кај Судска палата, кај Работнички дом, кај полициската станица „Беко“, потоа кај музејот на Холокаустот, а парцела за катна гаража ќе се продава и на Јужен булевар, во Маџир маало и една на левиот брег на Вардар, под Кале. Во близина на истата локација ќе се продаваат и три парцели наменети за хотелски комплекси. Државна земја за изградба на хотел по вторпат ќе се понуди за две локации во Охрид, а повторно ќе се бара и инвеститор за изградба на три облакодери во скопски Аеродром.

Се чини, едни од поатрактивните парцели кои ќе се даваат на продажба се оние во состав на поранешните касарни во Струмица, Гевгелија, Дебар и скопската касарна „Илинден“, кои од неодамна им се отстапени на општините. На сите локации е предвидена изградба на мини гратчиња, на комплекс од станбени и деловни згради, образовни и јавни институции, спортски терени....Иако посочените парцели се' уште не се поткрепени со урбанистички планови, што е пречка за каква било изградба, од Министерството за транспорт и врски велат дека ДУП-овите се во завршна фаза.

„До крајот на месецов се очекува да заврши постапката за донесување на плановите. Сите други локации што ќе се дадат на продажба се опфатени со урбанистички планови, а чисти се и во однос на имотно-правните односи“, дополнуваат од Министерството.

Инаку, надлежните тврдат дека досега не направиле проекции колку државата би ќарила доколку парцелите се продадат и по утврдената почетна цена за лицитирање. Како и во досегашните отуѓувања на државното земјиште, сопственик на парцелата ќе стане оној што ќе понуди најмногу пари, а наддавањата ќе се одржуваат доколку за нив се заинтересирани минимум двајца, но во одредени случаи и само еден субјект.