Старт со победа на Јосифоска во Брчко

Четвртата носителка Александра Јосифоска со успех го почна настапот на тенискиот фјучерс во босанскиот град Брчко, кој се игра на земјени терени и за награден фонд од 10.000 американски долари. Најдобрата македонска тенисерка, која неделава е 575. на ВТА-листата, на стартот славеше со 7-6 (0), 6-1 против бугарската квалификантка Јулија Стаматова. Победнички стартуваше и македонската двојка Димитар Грабулоски и Томислав Јотовски, кои на фјучерсот во бугарскиот град Добрич (земја, 10.000 долари) ја совладаа домашната комбинација Тихомир Грозданов и Димитар Петров со 6-2, 7-6 (3). Успешно тргна и Васко Здравкин заедно со Србинот Милјан Зекиќ, победувајќи ги Петар Иванов од Бугарија и Оскар Сабате-Бретос од Шпанија. Единствено Шендрит Деари и Николас Едлефсон, иако четврти носители, загубија на стартот со 6-2, 6-3 од Бугарите Динко Халачев и Петар Трендафилов. (Р.Д.)