Германците сакаат да им се врати марката

Стравувањата од пораст на инфлацијата кај Германците се толку големи што поголем дел од нив посакуваат да им се врати поранешната национална валута марката. Најновото истражување на институтот за јавно мислење ТНС ЕМНИД покажа дека над 60 отсто од Германците сакаат враќање на марката.

Клаус Петер Шопнер, директорот на институтот, за весникот „Билд“ изјави дека граѓаните на Германија во последните месеци ја изгубиле и својата последна илузија.

„По Втората светска војна Германците имаа три илузии, никогаш повеќе војна, сиромаштија и инфлација. Но, сите три илузии исчезнаа поради војната во Авганистан и светската економска криза“, рече Шопнер.

Над 50 отсто од Германците сметаат дека во наредната година ќе им опадне стандардот, а речиси две третини стравуваат за своите парични заштеди, покажала спроведената анкета. (Ек.Р.)