Во јуни нов Економско- социјален совет

Министерството за труд и социјална политика и претставниците на синдикатите во Македонија вчера се договорија за 10 дена да заврши постапката за доставување барања за решенија за репрезентативност, а најдоцна до 25 јуни годинава да биде формиран Економско-социјалниот совет.

„Во изминатите години имаше застој во функционирањето на Советот поради што лани пристапивме кон надополнување на Законот за работни односи. Согласно со измените, до вчера требаше да се формира Советот, но поради технички причини тоа се' уште не е сторено. Се договоривме за 10 дена да заврши постапката околу репрезентативност од синдикатите“, изјави министерот за труд, Џељаљ Бајрами, по средбата со синдикатите во Министерството.

Тој додаде дека посебна комисија треба да ја утврди репрезентативноста и најдоцна до 25 јуни годинава и пред конференцијата за Економско-социјалните совети во регионот, што е закажана за 30 јуни и 1 јули во Охрид да биде конституиран новиот ЕСС.

Претседателот на ССМ, Живко Митровски, го оцени утврдувањето и легитимирањето на синдикатите како клучна активност за синдикалното движење и истакна дека над 80 отсто од синдикатите здружени во ССМ се веќе спремни за реализација на предвидените задолженија. (М.Т)