Операција „јогурт“ или „пармезан“!

Бучковски предложи оригинален наслов за операцијата што ќе го истражува случајот „Сведмилк“

Оливера Војновска


Инспириран од насловите на акциите на полицијата именувани како „метастаза“, „пепел“, „змиско око“ експремиерот Владо Бучковски вчера во Собранието предложи МВР да се зафати со нова операција што би можела да ја нарече „јогурт“ или „кисело млеко“. Доколку, пак, сака насловот да прозвучува малку поинвентивно, според Бучковски, МВР може да ја именува акцијата како „пармезан“.

Една ваква операција би имала цел да го расчисти случајот „Сведмилк“, но, како што рече тој, „за тоа е потребно власта да има волја да се зафати со разоткривање на криминалот направен во шведската млекарница на чие отворање премиерот Никола Груевски пиеше јогурт“. Поранешниот премиер го кажа ова револтиран поради „леснотијата со која Владата се амнестира од каква било одговорност за пропаднатите странски приватни инвестиции“.

На вчерашната седница за пратенички прашања Бучковски од собраниската говорница го праша премиерот: зошто една година по најавениот рок, гасната електрана „Когел север“ се' уште не почнала со производство на електрична енергија? Притоа го потсети Груевски дека токму тој ја пресекол црвената лента на чинот на официјалната промоција на оваа странска инвестиција. Одговорот на прашањето премиерот му го препушти на вицепремиерот за економски прашања, Владимир Пешевски, кој кусо кажа дека станува збор за приватна, а не државна инвестиција. „Откако ќе ги исполни законските обврски во однос на документацијата, останува на инвеститорот да одлучи кога ќе почне да функционира приватната инвестиција“, рече Пешевски.

Бучковски со жалење констатира дека вицепремиерот е во незавидна ситуација да одговара на прашања, кои не му се допаѓаат на неговиот шеф во Владата.

Тој уште го праша Груевски да дали презел нешто и дали ќе ја информира јавноста за случајот поврзан со цариник - локален функционер на ВМРО-ДПМНЕ, кој за две години купил четири стана од корупција, и тоа два во Скопје и по еден во Крушево и во Охрид. Премиерот ја повтори вообичаената фраза дека Владата има цврста определба за неселективен пристап во борбата против корупцијата. Незадоволен од одговорот на Груевски, Бучковски ја постави дилемата: „Ако еден цариник за две години купил четири стана, тогаш синот на пратеничката Благородна Дулиќ (раководител во Царината) можел да купи 12, 14... “

И на вчерашната собраниска седница беше неизбежно прашањето за спорот со името. Лидерот на Нова демократија, Имер Селмани, го праша премиерот дали е подготвен и дали има волја и смелост за прифаќање компромисно решение, за државата конечно да престане да трпи загуби. И овој пат го слушнавме истиот одговор дека се трага по решение што нема да биде на штета на македонските и националните интереси. Имаше само една мала иновација, премиерот во оваа прилика нагласи дека „не сакаме решението да биде ниту на штета на Грција“.

„Има и политичка волја и смелост доколку се најде решение за прашањето за името, кое нема да направи сериозни и крупни штети ниту нам, ниту на другата страна, но не очекувајте од нас да најдеме набрзина решение со кое долгорочно ќе си направиме штета. Прашање е како се гледаат работите. Значи, ако се гледаат од еден агол може тоа да ви личи загуба, но ако се гледаат од друг агол, може да се каже дека, можеби, во моментот е спречување на некоја поголема штета. Ако по секоја цена во даден момент се оди да се прифати некое решение, тоа истовремено може да не биде како што велите вие загуба на Самитот, туку друга поголема штета за Македонија и за нејзините граѓани, вклучувајќи го во оваа приказна, пред се', и македонскиот народ. Ние не сакаме да има штети ниту на нивна страна. Нам не ни е желба некому да направиме штета. Меѓутоа, не сакаме да има штета и кај нас. Како што не сакаме ништо да одземеме, не сакаме ни нам да ни одземат“, истакна Груевски.

Тој додаде дека сме во потрага по такво решение и негираше дека Владата купува и ја одложува разрешницата на дводеценискит проблем со името.