За чистотата во салите, Османи дува и во маштеница

Министерот за здравство со контрадикторни изјави

За чистотата во оперативните сали, Бујар Османи дува и во маштеница. За првиот лекар во државата вонредната акција на хируршките сали е во духот на превентивата и за поставување повисоки стандарди.

Министерот за здравство се обиде да демантира дека на Хирургија биле затворени 11 оперативни сали поради најдена бактерија во воздухот. Османи сега вели дека не била затворена ниту една. Имено, била прекината работата во две сали заради дезинфекција. Но, министерот ниту потврди ниту негира дали се вршела вонредна дезинфекција и во другите сали. Остана нејасно зошто министерот го демантираше Државниот здравствено-санитарен инспекторат кога до пред два дена никој не негираше дека во 11 оперативни сали што се поврзани со еден вентилационен систем е најдена бактерија.

Доброупатени извори велат дека министерот се обидел да ја забошоти неговата намера да се затворат сите сали и да се чистат за викендот. Други, пак, коментираат дека се обидел да го прикрие незнаењето на Државниот инспекторат дека најдената бактерија не е патогена.

Директорот на ДЗР, Шемси Муса, не знаеше по кој правилник и стандарди е направена контролата, туку само рече дека микробиолозите од Центарот за јавно здравје им дале список на бактерии што не треба да ги има во салите.

Османи само рече дека не е добро да се пуштаат непроверени информации зашто на тој начин му се наштетува на јавното здравство. Целата вина, како по некое непишано правило, беше сведена на Службата за информирање.

За вентилациониот систем што е во надлежност на Заедничките служби, Османи кажа дека е исправен, но не кажа кога последен пат се сменети филтерите. (Ј.Ј.)