Будуќност пресилна за Металург

Ракометарките на Металург во моментов се далеку од квалитетот на Будуќност, во што се уверија на својот паркет во Автокоманда во натпреварот од петтото коло на Регионалната лига, кој гостинките од Црна Гора го добија со 31:16. Еден од најсериозните кандидати за пехарот во Лигата на шампионите сезонава беше преголем залак за македонскиот првак, на кој тоа му стана јасно уште во првото полувреме, кое подгоричанки го добија со 17:6. Поточно, сите илузии за колку-толку пристоен резултат исчезнаа веќе по првите 15 минути, во кои на почетното водство на Металург преку Зорица Десподовска противникот одговори со серија за 11:2 во своја полза. Единственото отворено прашање до крајот на средбата беше само со колкава разлика ќе заврши дуелот на двата нерамноправни ривала, кој за Металург е најсилниот тест пред двомечот од Купот на ЕХФ со Лада Толјати во почетокот на февруари.

По обичај, Мирјета Бајрамовска беше најефикасна во домашниот тим со шест гола, Мечевска, З. Десподовска и Е. Ѓорѓиевска постигнаа по три и Д. Ѓорѓиевска еден. Во составот на Будуќност се издвоија Радичевиќ и К. Булатовиќ со по седум погодока.

Со две победи и три пораза, Металург ос��ана на четвртото место меѓу седум екипи, а Будуќност се израмни со водечката Подравка, која има осум бода. (Р.Д.)