Драмски го испраќа Мите Грозданов во пензија
Актерот Мите Грозданов, вечерва, во 18 часот, со свечената изведба на монодрамата „Историска хронологија“ на малата сцена на својот матичен Драмски театар, ќе замине во пензија, простувајќи се од публиката онака како што доликува – театарски. Во изведбата на монодрамата, која вклучува текстови од повеќе автори, ќе му помогне Будимир Лазов.
На овој начин, ансамблот на Драмскиот театар му возвраќа на Грозданов со почит за четирите децении минати на оваа сцена каде остварува повеќе од 60 улоги, од кои дури 40 главни. Актерското портфолио на Грозданов содржи и десетина играни филмови, повеќе ТВ-филмови, огромен број ТВ и радиодрами, како и ТВ и радиодрамски серии. Повеќе од деценија и пол тој е дел од првиот приватен театар „Македонија“. (К.Р.) |
