„Ако никој не свири...“, ново ЦД во издание на „Стотројка“
„Ако никој не свири… во живо на стотројка“ е насловот на четвртото музичко издание на младата издавачка куќа „Стотројка“ кое својата промоција ќе ја доживее вечерва во Културниот центар „Мала станица“ во 20 часот. „Ако никој не свири...“ претставува компилација од 18 композиции на изведувачи што и припаѓаат на т.н. независна македонска музичка сцена, а кои се одсвирени во живо на програмата на Музичкото радио „Канал 103“. Меѓу другите, на ЦД-то се наоѓаат теми од „Беи д Фиш“, „Д Џон“, „Фолтин“, „Проект Жлуст“, „ПМГ Колектив“, „Баклава“, „ТБ Трачери“, „Стринг Форсис“, „Мугер Фугер“...
Во текот на изминатите три години, во „глувата соба“ на ова скопско алтернативно радио настапија голем број македонски бендови и уметници претставувајќи ја својата работа пред еден поширок и „невидлив“ аудиториум. Компилацијата со наслов „Ако никој не свири…“ е првиот опиплив документ за овие концерти во етерот и е само еден сегмент од активностите на „Стотројка“, која постојано се насочува кон поддршка и промовирање на квалитетна македонска музика. Оваа компилација претставува мал пресек на неверојатната креативност на домашната музичка сцена во целата своја стилска шареноликост.
Најголемиот дел од поместените песни се снимени и миксани од Ален Хаџи-Стефанов. Дизајнот на омотот е на Неда Фирфова. (Т.И.) |
