Поглед
Културата во менгеме
 Тина Иванова
Бурната најава и медиумската кампања за т.н. капитален владин проект во културата („Македонска книжевност“, „Нобеловци“) почнаа да го губат здивот. Преземените конкретни чекори за инвестицијата вредна 24 милиони денари за печатење 130 тома највредни македонски литературни остварувања, како и презентацијата на делата на добитниците на Нобеловата награда за литература преведени на македонски јазик, се чини се заплеткаа во одделни интересни структури на владејачката партија. Проектите најавени како државни и финансирани со буџетски пари, значи со народни, се сопнаа прво на партиската контрола врз парите, потоа во партискиот состав на комисијата за избор на авторите и делата што треба да се печатат, па на крајот на изборот на партиската печатница што го доби партискиот тендер.
Но, нели, предизборната најава беше дека ова ќе биде национално-историски и македонско-патриотски проект. И во еуфоричните најави не стануваше збор за партиска доминација врз контролата на реализацијата на целиот проект. Но, и овој пат се покажа дека партијата што ја има власта нема намера да ги тргне прстите од државните пари. Па, затоа и оваа идеја дочекана со радост сега стои на стаклени нозе.
За партизација на проектите прво се побунија писателите. Изразија сомнеж во објективноста поради партиската припадност на луѓето што ќе го прават изборот. Потоа негодуваа издавачите поради местенките за тоа кој ќе биде носителот на проектот. На крај реагираа и печатарите поради фактот што на партиски тендер работата ја доби неафирмирана и технички неопремена печатница.
И така се' со ред. Ништо ново. Изборите завршија, а историските капитални проекти ��е деградираат. |
