Претходен број

Нова амбасадорска битка меѓу владата и претседателот

Црвенковски не потпишал укази за двајца амбасадори - МНР се жали, Кабинетот бара почитување на процедурата

Тамара Грнчароска

Препукувањата околу амбасадорите меѓу владата на Македонија и претседателот на државата продолжуваат. По есенската сага околу именувањето и потпишувањето на указите за испразнетите амбасадорски места, вчера од Министерството за надворешни работи со соопштение информираа дека претседателот на државата, Бранко Црвенковски, не ја одобрил постапката за акредитирање на Петар Јовановски и на Пајо Авировиќ за вонредни и ополномоштени амбасадори во Индија и во Израел. Канцеларијата за врски во Израел пред околу две недели се подигна на ниво на амбасада, а исто така и канцеларијата во Индија.

Во соопштението од МНР, кое е испратено, покрај за информирање на јавноста, како што се наведува, и „за да го потсети господинот Црвенковски“, дека министерот Милошоски „уште пред објавувањето на предлозите за поставување амбасадори во Њу Делхи и Тел Авив лично го информираше претседателот, при што од страна на шефот на државата не беа изнесени никакви забелешки за именувањето на двајцата професионални амбасадори“. Од МНР се надеваат дека претседателот ќе го исправи ваквиот пропуст и ќе стави потпис на указите за акредитирање ��а Јовановски и на Авировиќ за вонредни и ополномоштени амбасадори во Индија, односно во Израел.

Од Кабинетот на претседателот вчера соопштението на МНР го оценија како дезинформација, наведувајќи дека е точно оти Милошоски пред околу две недели „го информирал претседателот за изборот на двајцата амбасадори“, но како одлука на Владата за нивно именување. „Со тоа е прекршен член 37 од Законот за надворешни работи“, изјави портпаролот на Кабинетот на претседателот, Зоран Иванов. Според тој член од Законот, по претходна усогласеност на претседателот и министерот за надворешни работи за кандидатите за амбасадори, шефот на дипломатијата поведува процедура за нивно именување до владата. За тоа дека е прекршена процедурата од Законот за надворешни работи со именување амбасадори без претходна консултација со претседателот Министерството било информирано вчера.

Од Кабинетот информираат дека имињата на двајцата дипломати за амбасадори не се спорни, туку е прекршена процедурата за нивно именување, која законски е регулирана. „И двајцата дипломати на претседателот му се познати како професионалци за кои нема забелешки за нивното работење“, информираат оттаму, додавајќи дека и државите во кои тие треба да се именуваат како амбасадори се многу важни за Македонија.

Јовановски и Авировиќ се професионални дипломати. Јовановски за Њу Делхи замина од позицијата шеф на протокол во МНР, по претходна служба во Брисел, додека Авировиќ за Тел Авив замина од функцијата советник на министерот за надворешни работи, а претходно беше во македонската амбасада во Париз.

Последната „амбасадорска битка“ на релација влада - претседател може да значи и вовед во нова „војна“, која можеби оваа есен ќе се води околу пополнувањето амбасадорски места во Атина, Канбера, Отава, од каде што се очекува да се вратат амбасадорите чии мандати истекуваат до крајот на летото. Ако на тоа се надоврзе и испразнетото амбасадорско место во Софија по враќањето на амбасадорот Абдурахман Алити пред околу еден месец, каде што се' уште не е назначен нов амбасадор и, како што информираат од МНР, должноста ја врши професионален дипломат чие име не се соопштува, станува се' појасно дека македонската дипломатија продолжува да биде средство за одмерување на силите меѓу двете институции.