Претходен број

Возот за 9 јули пропуштен, ќе се чека некој друг

Македонија се реши за предвремени избори наместо решавање на спорот за името

Соња Крамарска

Во постизборната еуфорија и големата поддршка што македонските граѓани и' ја дадоа на десничарски ориентираната партија ВМРО-ДПМНЕ речиси никој и не забележа дека Македонија го испушти и возот наречен 9 јули. Овој термин меѓународната заедница (генералниот секретар на НАТО, Јап де Хоп Шефер, американскиот државен секретар Кондолиза Рајс и други странски дипломати) им го даде за рок на македонските власти да го решат проблемот за името со Грција за да може нашата земја да фати приклучок со Хрватска и со Албанија за започнување на процедурата за зачленување во НАТО.

Меѓутоа, Хрватска и Албанија се на прагот за започнување на пристапните преговори, а Македонија се' уште нема избрана влада по предвремените избори што се одржаа на 1 јуни. Преговорите за нова влада одат бавно, иако очекувањата беа дека веднаш по изборите власта, за која се очекуваше дека ќе добие уште еден мандат, ќе го забрза формирањето влада за да може да му се посвети на проблемот со името и интегрирањето во НАТО и во ЕУ.

Но, на старо-новата владејачката гарнитура очигледно не и' се брза, иако од сите страни пристигнуваат отворени предупредувања дека без решение на проблемот со името трајно се блокирани евроатлантските перспективи на земјава. Мандатарот и лидер на владејачката партија ВМРО-ДПМНЕ, Никола Груевски, сите свои активности ги пренасочи кон внатрешните економски прашања, а грчките притисоци и блокади, чие неутрализирање е круцијално за напредокот на земјава, ги маргинализира.

Владиниот портпарол Ивица Боцевски, на нашето прашање како Владата го коментира пропуштениот рок, вчера одговори дека сите се согласни, ��ако што рече, оти земјава ги исполнила сите стандарди и критериуми за членство во НАТО, но дека поради билатерален спор со една земја членството се одлага.

Оваа владина формулација, сепак, не им оди на рака на очекувањата на граѓаните дека по зацврстувањето на власта на премиерот Груевски и на неговата коалиција земјава ќе почне да чекори во правец на конечното остварување на 17-годишните аспирации за влегување во друштвото на европските земји.

Ниту домашните збиднувања не оставаат простор за поголем оптимизам. Наместо релаксација на политичката клима по големата победа на десницата, која апсорбира без малку половина милион гласачи, што е своевиден изборен рекорд, веќе еден месец трае мачното исчекување дали победничката коалиција ќе успее да ги намали тензиите по трагичните настани што се случија на денот на изборите.

Посебна драма се преговорите на Груевски со двете албански партии - ДУИ и ДПА за стапување во коалиција со една од нив, што дополнително го отежнува процесот на доаѓањето на новата влада на сцена.

Потпретседателот на опозицискиот СДСМ, Зоран Заев, коментирајќи го рокот 9 јули, што земјава очигледно го пропушта и покрај силните ветувања при распишувањето на предвремените избори дека тие нема да ги забават процесите, изјави дека за владејачката гарнитура и натаму останува на прво место грижата за рејтингот на премиерот и на неговата коалиција.

„За жал, продолжи истата тенденција на ѕидање на рејтингот на власта наместо решавање на горливите прашања. Отворањето на проблемот со имотите на егејските Македонци во преговорите што се водат со Грција за решавање на спорот за името е лош сигнал, кој говори дека тешко ќе се изнајде решение со нашиот јужен сосед. Оваа влада очигледно нема капацитет да го реши спорот со името, што може да значи само едно, а тоа е дека економското тонење на земјава ќе продолжи и дека доаѓаат се' потешки времиња за граѓаните“, вели Зоран Заев.

Деновиве во земјава се одржуваше форум на тема „Безбедноста на Балканот: НАТО по самитот во Букурешт“ на кој македонските новинари по којзнае кој пат се интересираа за перспективите на својата земја на европската сцена и на меѓународната.

Томас Навратил, заменик-американски амбасадор во Македонија, можеби најексплицитно од сите досегашни странски дипломати и' ја соопшти на македонската јавност поразителната вест. „Многу е тешко да се предвиди кога ќе дојде поканата за членство во Алијансата“, кратко и јасно рече тој.

Алузијата на Навратил е очигледна, а тоа е дека ако досега се спомнуваа некакви рокови и датуми, отсега веќе никој не може да даде прогноза како ќе се развиваат работите, бидејќи владата во Скопје, која остро се противеше на грчките барања за компромис за името, ја зацврсти својата власт, а обидите на меѓународната заедница да изнајде дипломатски патишта за разрешување на спорот останаа јалови.

Но, и оваа изјава на Навратил како да не го вознемири никого, бидејќи не предизвика никакво бранување во јавноста, што е уште еден показател дека постизборната еуфорија сосема ја замагли реалноста во Македонија, која и на домашен и на надворешнополитички план не е розова.