Сакаат да ја истераат Јулија Тимошенко
Била пасивна и не ја напаѓала Русија за време на војната во Грузија
МОСКВА - Големата афера со обвинување на актуелната премиерка Јулија Тимошенко дека е државен предавник доби и второ продолжение. Вршителот на должноста претседател на Службата за безбедност на Украина, Валентин Наливајченко, им соопшти на новинарите дека материјалите што ги добил од Секретаријатот на претседателот на државата содржат „седум доста сериозни позиции од сферата на националната безбедност на државата“. Наливајченко потврди дека полицијата почнала да ја истражува вистинитоста на материјалот. Тие се однесуваат на безбедноста на земјата, потоа на енергетската безбедност и друго. Украинските закони не го ограничуваат времето до кога мора да се завршат полициските проверки. Од сето тоа се стекнува впечаток дека претседателот Јушченко има намера да ја компромитира „убавата Јулија“, а потоа да ја тргне од премиерската фотелја.
Луѓе од претседателската администрација ја обвинија Јулија Тимошенко за политичка корупција, како и за тоа дека намерно била пасивна и не ја напаѓала Русија за време на војната во Грузија, бидејќи наводно Москва и' ветила помош на претстојните претседателски избори.
Интересно е и тоа што токму во времето на излегување на аферата највлијателниот и најугледен украински неделник „Кореспондент“ објави топ-листа на највлијателни домашни политичари за 2008 година. На прво место годинава се најде токму Јулија Тимошенко. Ранг-листата се прави врз основа на популарноста и влијанието на политичарот во Украина. Угледниот неделник оценува дека претседателот Виктор Јушченко го загубил кредитот на доверба што го имал кај народот. Лидерот на Региони на Украина, Виктор Јанукович, бил премногу пасивен.
Кога се знае дека во сите словенски земји народот по автоматизам е наклонет кон оние што имаат ореол на „политички маченик“, администрацијата на украинскиот претседател Јушченко како да е платена да работи во корист на Јулија Тимошенко, која по споменатата афера има уште поголеми шанси да стане претседател на државата и со леснотија да го победи Јушченко. Во времето на Леонид Кучма, Јулија Тимошенко кратко време беше во затвор, но тоа не ја компромитираше, туку само и' донесе нови гласови. (Б.В.) |
