Палестинците ќе добијат околу 400 хектари територија
ГАЗА - Израел се согласи да ја промени маршрутата на контроверзниот ѕид што се гради во и околу Западниот Брег. Со постигнатиот договор ќе им се остави повеќе земја на Палестинците во близина на најголемата израелска населба Маале Адумим. Одлуката дојде како одговор на жалбите поднесени од Палестинците до израелскиот Врховен суд. Израелската влада соопшти дека ќе го премести ѕидот поблизу до населбата, со што ќе дозволи 400 хектари палестинска територија да остане недопрена. Маале Адумим е изградена на земја за која Палестинците имаат претензии за формирање на идната држава и како и сите населби се смета за нелегална според меѓународното право, иако Израел го отфрла тоа.
Палестинците посочуваат дека ѕидот го повредува нивното право на слободно движење и им одзема територија, додека, пак, Израел е на ставот дека е потребен за да се сопрат милитантните напади. Израел во 2002 година почна со изградба на ѕидот во Западниот Брег. Тој во голема мера беше критикуван од страна на меѓународната заедница поради опколувањето на палестинските области околу израелските населби, наместо да ја следи зелената линија која ја претставува границата што го разделува Израел од Западниот Брег. Меѓународниот суд на правдата во 2004 година донесе одлука дека ѕидот е нелегален онаму каде што навлегува во Западниот Брег и побара да биде урнат. Израелската влада спроведе само две од петте промени на маршрутата кои беа наредени од страна на Врховниот суд. (Би-Би-Си)
