Украдени два милиона денари од обложувалницата „Вил-Хил“
Два милиона денари се украдени во вчерашното разбојништво врз двајца вработени во спортската обложувалница „Вил-Хил“ во Скопје. Разбојништвото се случило околу 10,30 часот на раскрсницата од булеварот „Партизански одреди“ и улицата „Бледски договор“ кога двајцата обезбедувачи М.С. и Б.Б. вршеле дотур на пари и билтени. Тие ги подигнале парите од саботниот промет и тргнале кон своето „тико“, паркирано на пешачкиот остров на улицата. Тогаш биле нападнати од двајца насилници, кои со маски на главите и безбол-палки ги претепале вработените. Им ги зеле вреќите со пари и побегнале со „тикото“, со кое требало да заминат вработените во обложувалницата. Претепаните се однесени во Ургентниот центар, а полицијата почна со потрага по сторителите.
Очевидци велат дека едниот од напаѓачите, незаинтересирано ги гледал обезбедувачите, за во еден миг да ги нападне, во што му помогнал другиот партнер.
Дознаваме дека автомобилот „тико“ набргу бил пронајден во близина на ресторанот „Балканика“. Истрагата е во тек. (Г.А.) |
