На Пчиња фатени рибокрадци со 15 мрежи
КУМАНОВО - При контрола на риболовниот ревир на реката Пчиња кај селото Студена Бара, рибочуварската служба на СРД „Пчиња“ од двајца рибокрадци од Скопје заплени 15 мрежи-самици и други недозволени средства за риболов, кои како доказен материјал ќе бидат приложени заедно со прекршочната пријава во Судот за прекршоци во Куманово.
„Сезоната на спортски риболов штотуку започнува, а нашата рибочуварска служба веќе има полни раце работа. Рибокрадците не спијат, меѓутоа и нашите тројца чувари речиси деноноќно се во акција. Поради немоќта на надлежните во државава да се справат со криволовците на нашите реки, цехот го плаќаат чесните спортски риболовци. За оваа година членарината и дозволата за риболов од ланските 800 денари е зголемена на 1.500. Од нив, 80 проценти ќе бидат наменети за заштита на рибниот фонд. Од оваа година одиме со двајца постојано вработени професионални рибочувари и повеќемина волонтери. Оваа година борбата со рибокрадците ќе биде немилосрдна, се разбира, под услов и судовите да се однесуваат според законот со посериозен приод кон пријавите што ги поднесуваме“, вели Драган Младеновски, шеф на Комисијата за заштита на рибниот фонд на СРД „Пчиња“. (Ст.Б.) |
