Саркози фингира блискоисточен мир
Францускиот претседател се сретнува со лидерите на Сирија, Турција и Катар
ДАМАСК - Францускиот претседател Никола Саркози ќе се сретне со лидерите на Сирија, Турција и Катар во обидот да се зајакнат напорите за постигнување мир на Блискиот Исток. Саркози е во дводневна посета на Дамаск, која има за цел да ги зацементира повторно оживеаните врски меѓу Франција и Сирија. Франција, која во моментов го има ротирачкото претседателствување со ЕУ, се надева дека ќе помогне во напорите за посредување мир на Блискиот Исток.
Сирискиот претседател изјави дека „самитот за стабилност“ ќе ја постави основата за евентуални директни разговори со Израел. „На самитот ќе се направи обид да се формулира декларација за принципите што ќе ја формираат основата за директни мировни разговори меѓу Сирија и Израел“, изјави Башар ал-Асад. На сесијата беше и турскиот премиер Реџеп Таип Ердоган, чијашто земја од мај беше медијатор на последните четири рудни индиректни разговори меѓу Израел и Сирија. Четвртото место на масата го зазеде емирот од Катар, шеикот Хамад бин Калифа ал Тани и неговиот премиер Хамад бин Јасим ал Тани, кој помогна во посредувањето на внатрешниот мировен договор во Либан, исто така во мај. Директни израелско-сириски преговори, кога во фокусот на вниманието беше судбината на Голанската висорамнина окупирана од Израел - за последен пат се одржаа во 2000 година под покровителство на САД. Асад изјави дека Сирија ја чека „петата круцијална рунда разговори...за да ја утврди еволуцијата на овие преговори“, но процесот беше ставен на чекање поради политичките промени во Израел. Израелскиот премиер Ехуд Олмерт, чијшто мандат е погоден од скандали, обелодени дека ќе се повлече, а неговата партија Кадима на 17 септември одржува избори за нов лидер, кој би можел да стане следниот премиер. (Би-Би-Си)
|
