Чејни со појас за спасување на Украина
Доаѓањето на Чејни во Киев многумина во Украина го сфатија како знак на поддршка за претседателот Виктор Јушченко
Од нашиот дописник
Бранко Влаховиќ
МОСКВА - Иако во разговорот меѓу потпретседателот на САД, Дик Чејни и неговиот домаќин во Киев, Виктор Јушченко најмногу стана збор за судирот меѓу Грузија и Русија, како и ситуацијата во целиот регион, за украинскиот претседател, всушност, беше најважно што уште еднаш доби американска поддршка. Чејни рече дека Вашингтон ја поддржува идејата Украина да стане членка на НАТО и додаде дека ниту една земја не може да му диктира на Киев дали ќе биде членка на некој воен сојуз. Сосема е јасно дека алузијата на Чејни се однесуваше на Русија, бидејќи токму од Москва овие денови неколку пати беше кажано дека сите социолошки истражувања во Украина покажуваат дека мнозинството од народот не сака во НАТО.
„Руската Црноморска флота претставува опасност за Украина“, изјави вчера претседателот на Украина по разговорот со американскиот потпретседател Дик Чејни. Јушченко ја повтори веќе изречената оцена дека раководството на Украина смета оти Русија од Крим тргнува со свои бродови во судири со други држави, односно Грузија. Според државниот договор, Русија може да ги користи базите на Крим до 2017 година.
Освен поддршката за влез во НАТО, Чејни рече дека „блиските стратегиски односи меѓу Украина и САД се во интерес на двете земји“. Чејни одвоено разговараше не само со Јушченко, туку и со премиерката Јулија Тимошенко. Иако нема информации дали Чејни разговарал со нив за политичката криза во Украина, многумина сметаат дека доаѓањето на американскиот потпретседател сликовито кажано е „појас за политичко спасување“ на претседателот Јушченко, кој има се помалку приврзаници.
Веднаш по завршувањето на разговорите со Чејни, Јушченко јавно и' постави ултиматум на Јулија Тимошенко. Бараше таа јавно да ја обвини Русија „поради агресија на Грузија“, но и да ги укине законите кои се донесени овие денови, а со кои се зголемува улогата на премиерот и се намалува улогата на претседателот на државата.
Главна тема во Украина и понатаму е распаѓањето на владеачката коалиција. Во војната меѓу претседателот и премиерката повеќето Украинци како победник ја гледаат Јулија Тимошенко. Во прв план повторно доаѓа поранешниот премиер и лидер на Украински региони, Виктор Јанукович, без чии гласови во овој момент кој и да сака не може да состави нова коалиција .
Од блокот на Јулија Тимошенко сега стигнуваат предлози наесен истовремено да се одржат избори не само за парламент, туку и за нов претседател на Украина. Претседателските избори би требало да се одржат дури по нешто повеќе од една година, но сегашната криза ја разниша фотелјата на Виктор Јушченко. Нему му се забележува дека ќе биде запаметен по три распуштања на парламентот.
Украинската Рада вчера му се обрати на претседателот Виктор Јушченко со барање да го смени Виктор Балога сегашен раководител на претседателскиот секретаријат. Балога е главен ривал против Јулија Тимошенко, па приврзаниците на убавата Јулија сметаат дека токму тој го наговара претседателот Јушченко јавно да ја напаѓа премиерката.
|
