Во Етиопија 4,6 милиони луѓе ќе умрат од глад
Три милиони деца може да умрат од глад и разни болести по намалениот прилив на донации од меѓународната заедница
НаJроби - Повеќе од 14 милиони жители на неколку држави од Рогот на Африка се загрозени поради хронична неисхранетост и болести, а најтешка е ситуацијата во Етиопија каде што животите на околу 4,6 милиони луѓе се доведени во прашање поради недостиг од храна, предупреди УНИЦЕФ.
Организацијата соопшти дека постои стравување дека околу три милиони деца може да умрат од глад и разни болести по намалениот прилив на донации од меѓународната заедница.
Најтешко им е на жителите на Етиопија, Сомалија, Еритреја, кенија, Уганда и Џибути, а проценките се дека ситуацијата може да се влоши, предупреди фондот на ОН за грижа на децата.
- Доколку не се преземат акции и помошта не стигне наскоро, кризата ќе има несогледливи последици за тие луѓе, изјави регионалниот директор на УНИЦЕФ за источна и југоисточна Африка, Пер Енгебек.
Тој додаде дека освен намалениот квантум помош посебен проблем за доставување хуманитарна помош претставуваат бунтовниците кои ги напаѓаат хуманитарните работници.
УНИЦЕФ предупредува дека 75.000 деца ќе умрат од глад доколку итно не земат терапија. Фондот стравува дека наскоро бројот на загрозени лица ќе биде уште поголем. (МИА)
|
