Претходен број

Пазарите ќе се фискализираат по влезот во ЕУ

Владата не се откажува од фискализацијата на пазарите, туку ја одложува до влезот на земјава во ЕУ

Александар Пешев



Владата не се откажува од одлуката за фискализација на пазарите, но ќе почека додека Македонија не влезе во Европската унија. Дотогаш е предвидено тезгаџиите да плаќаат паушал, чија висина дополнително ќе се утврди. Организаторите на пазарите се задоволни од владината одлука, а од Здружението на пазарџиите најавуваат дека ако Македонија влезе во ЕУ, може и да се затворат пазарите за доброто на земјата.

По вчерашната средба со претставниците од пазарите, вицепремиерот Зоран Ставрески рече дека одлуката на Владата за одложување на фискализацијата е со цел да ги задоволи интересите на повеќе од 30.000 лица кои преживуваат од тезгите.

„Практично се дава преоден период за фискализација до влезот во ЕУ“, појасни Ставрески, додавајќи дека по влезот во ЕУ пазарџиите „ќе влезат во системот и ќе видат какви придобивки ќе имаат од тоа“.

Претседателот на Групацијата на пазарите при Стопанската комора, Драган Василевски, изрази благодарност за донесената одлука, но не даде конкретен одговор на прашањето што ќе се прави со фискалните апарати кои организаторите на пазарите веќе ги имаат набавено за тезгаџиите.

„Точно е дека имаме земено фискални каси. Ќе се снајдеме“, рече Василевски, кој пред неколку дена потврди дека се набавени фискални апарати за речиси сите тезгаџии на пазарите и дека се чека трговците да изразат желба да ги најмуваат касите.

Претседателот на Здружението на пазарџиите, Екрем Долек, истакна дека е донесено решение за проблем што се одолжува веќе четири години.

„Дај, боже, од утре да влеземе во Европската унија. Веднаш ќе ги затвориме пазарите за доброто на Македонија“, истакна Долек.

Министерот за финансии, Трајко Славески, потсети дека барањето за фискализација на пазарите не се укинува, туку се одложува.

„Не е чудно во иднина да се издаваат фискални сметки на пазарите“, рече Славевски.

Инаку, проблемот со фискализација на пазарите е присутен веќе четири години и предизвика веќе еден протест на сопствениците на тезги. Главни аргументи на пазарџиите против фискализацијата беа примерите од европски земји, во многу од нив не се издаваат фискални сметки, и нелојалната конкуренција од дивите препродавачи кои не закупуваат тезги, не ги регистрираат приходите и работат без дозвола.