Против Јужна Африка во Јоханесбург
Кевин Андерсон на мастерсот во Мајами го изненади Ѓоковиќ
Јужноафриканците среќни што им падна Македонија во Дејвис купот
Роберт Димитриевски
Единствениот натпревар од првото коло во рамките на Првата група од Евроафриканската зона на Дејвис купот меѓу Јужноафриканска Република (ЈАР) и Македонија, ќе се одигра во Јоханесбург, обелодени претседателот на Јужноафриканската тениска асоцијација (САТА), Јохан Кортс. Јужноафриканците во јули годинава таму ја пречекаа Данска и ја победија со максимални 5:0 во второто коло од Втората група. Станува збор за тенискиот комплекс „Емперорс палас“, со 1.400 места за седење, а централниот терен е со бетонска подлога и на отворено. Ако од 6 до 8 март 2009 падне Македонија, во тој објект ќе гостува и Белорусија во второто коло предвидено за 8-10 мај.
„Натпреварот со Данска беше распродаден, што покажува дека тениската публика во ЈАР е гладна за меѓународни натпревари. Играчите сакаат да играат дома и да добијат поддршка од навивачите“, изјави генералниот секретар Јан Смит.
Во САТА и во националниот тим на земјата-освојувач на Дејвис купот во 1975 година не го кријат задоволството од ждрепката и сметаат дека им е отворен патот до плејофот за враќање во Светската група, во која настапуваа од 1995 до 1998 година.
„Некогаш Бог ви се насмевнува“, беше реакцијата на претседателот Кортс по извлекувањето во вторникот во Мадрид.
„Ждрепката е поволна“, смета и селекторот Џон-Лафни де Јагер, под чие водство најбогатата африканска држава со осум победи во низа за две години од Третата напредуваше до Првата група. „Тоа што ќе играме два меча на домашен терен е фантастично не само за тимот, туку и за цела Јужна Африка“.
Во тамошните медиуми преовладува мислењето дека Македонија не е сериозна закана, повикувајќи се на нискиот моментен ранкинг на нејзините репрезентативци, споредувајќи го 615. место на АТП-листата во сингл на првиот македонски рекет Предраг Русевски со 118. на нивниот најдобар тенисер Кевин Андерсон. Според нив, многу потешко ќе биде против Белорусија, која беше совладана во 1999 година во Кејп Таун, но ЈАР загуби на гостувањето во Минск пред две години и тогаш испадна од Втората група. Домашниот терен се смета за голема предност во двата претстојни дуела.
Јужна Африка се пласира во Првата група со победата од 3:2 на гости над Монако минатиот викенд. Нејзин творец беше Рик де Вуст (170.), кој го донесе решавачкиот поен со победата над Бенжамен Балере (457.) од 7-5, 6-2, 6-1. ЈАР по првиот ден водеше со 2:0, но потоа загуби во двојки, по што и Андерсон беше изненаден од Жан-Рене Лиснар (231.) со 6-3, 6-4, 7-6 (2). |
