Љубљана ќе го преиспитува купувањето на „Космофон“

Словенечката влада ќе ја преиспитува купопродажната зделка на поранешен „Космофон“, а сегашен „Оне“. Ова го најавува ревизорскиот извештај на „Телеком Словенија“, кој го обработува купопродажниот договор на оваа телекомуникациска компанија направена со македонскиот втор мобилен оператор. Спроведената ревизија е направена да се расчистат сомневањата за евентуални неправилности во договорот за купување тежок 190 милиони евра, како и информациите дека останатите компании во трката за купување понудиле далеку помалку пари од „Телеком Словенија“. Сомнежите за неправилности се зголемиле и по информациите дека „Космофон“ имал помал број активни претплатници од оние што биле пријавени кога се реализирала зделката.

Надзорниот одбор на „Телеком Словенија“ деновиве ја разгледа ревизијата направена од ПВЦ на купувањето компании во Македонија од страна на „Телеком Словенија“ и купувањето на „најди.си“. Врз основа на добиените согледувања, претседателот на надзорниот одбор, Томаш Бергинс, ги презентираше главните заклучоци од деталната ревизија, кои укажуваат на недефинирани постапки за стекнување и недефиниран начин на одредување на цената на стекнувањето. Во повеќето купени компании, нивото на контрола над компаниите и малцинството акционери е многу мало, а членовите на Надзорниот одбор не биле соодветно информирани. Врз основа на споменатиот извештај и две дополнителни одделни правни мислења, Надзорниот одбор на „Телеком Словенија“ го задолжи актуелниот менаџмент да подготви се' што е потребно за да започне соодветна правна постапка во однос на одговорноста на менаџментот и надзорните одбори во нивните претходни состави до 15 јули.

Што се однесува до главните насоки за идниот развој на матичната компанија и на групацијата „Телеком Словенија“, тие, главно, се однесуваат на целосна консолидација и оптимизација во целата групација во Словенија и во странство, со посебен нагласок на контролирањето и ограничувањето на трошоците.

Овие чекори се преземаат по првичните индикации за нелогичности во преземањето на „Космофон“ од грчки ОТЕ и цената што е платена за него, а надополнета со лошите финансиски резултати од работењето на словенечки „Телеком“ за првиот квартал годинава. Бројките покажуваат дека прв пат од постоењето оваа компанија остварила загуба, што најмногу се должи на работењето токму во Македонија. Нето-загубата во првиот квартал била 600 илјади евра, наспроти профитот од 14 милиони евра минатата година.

Во Македонија, во првиот квартал од годината „Телеком Словенија“ остварил загуба од 5,3 милиони евра пред оданочување. При објавување на овие информации од централата во Словенија изјавија дека загубата се должи на редефинирањето, здружувањето и ребрендирањето на компанијата, која беше купена минатата година. Поради тоа се доцнело со некои од проектите, а ефект имала и глобалната криза. (А.С.)