Болт го израмни најдобриот резултат на стотка сезонава

Светскиот рекордер победи во Лозана со време од 9,82 сек., колку што годинава има истрчано и Пауел

Освојувачот на три златни олимписки медали Јусеин Болт од Јамајка го израмни најдобриот резултат на 100 м сезонава, победувајќи во својата првата трка по шестнеделната пауза со време 9,82 сек. на атлетскиот митинг од Дијамантската лига во Лозана. Светскиот рекордер не се натпреваруваше од повредата на левата Ахилова тетива при крајот на мај.

Постигнатиот резултат на Болт е идентичен на тој на сонародникот Асафа Пауел, кој досега беше осамен како најдобро време сезонава.

„Дефинитивно имав болка. Но, таа не беше неподнослива, туку мала“, изјави победникот, кој зад себе го остави својот тимски колега Јохан Блејк, кој го истрча своето најдобро време сезонава од 9,96 сек. Чуранди Мартина од Холандски Антили заврши трет со 10,16 сек.

Распродадените трибини го скандираа името на Болт секојпат кога ќе беше споменато од официјалниот спикер и со овации ја поздравија неговата победа.

„Стартот не беше најдобар, но првите 10 м беа многу добри“, прокоментира Болт.

Тој доминираше во втората половина од трката, но не изгледаше како да запнува против релативно слабата конкуренција. Многу посилен тест за него ќе биде митингот во Париз на 16 јули, каде што првпат сезонава ќе се сретне со Пауел. Болт признава дека тоа ќе биде најголемиот предизвик за него по поставувањето на светскиот рекорд од 9,58 сек. на Светското првенство во Берлин минатата година, кога ги победи Тајсон Геј од САД и Пауел.

Топлото време и публиката во Лозана вели дека го инспирирале.

„По загревањето реков дека ќе истрчам 9,88 сек.“, додаде првата ѕвезда на митингот, кој прво беше планирано да трла на 200 м, но се префрли во двојно покусата дисциплина откако неговиот доктор го советуваше да не трла подолга трка.

Американецот Волтер Дикс победи на 200 м со 19,86 сек.