Почина шпионката за која Хитлер нудел милиони

Во неделата, 7 јули, 23 дена пред својот 99. роденден, во Лондон почина Ненси Вејк, агентка од Втората светска војна, позната под кодираното име Бело Глувче, токму поради способноста да ги избегне нацистичките заседи. Ненси Вејк била позната како најотмената агентка што ја познавал светот, а некој колега ја опишал како „најженствената жена до моментот кога ќе почне тепачка, тогаш се претвора во пет мажи“. За агентката Бело Глувче останало забележано дека со голи раце убила еден СС-овец за да го спречи да вклучи аларм и да повика помош. Тоа била жена која во бегство од нацистите минала 800 километри на велосипед, минувајќи низ окупирани подрачја...

Родена на Нов Зеланд, како најмлада од шест деца, и порасната во Сиднеј, Ненси како 16-годишничка ја напуштила јужната полутопка и таклала низ Њујорк, Лондон и Париз, каде што работела како дописничка од Европа за весниците на американската медиумска компанија „Херст“. Во Франција станала сопруга на богатиот индустријалев Хенри Едмунд Фиоче. Како новинарка, Вејк го интервјуирала и Хитлер во Виена во 1933 година. Но, кога војската на Хитлер ќе ја окупира Франција во 1941 година, таа станува курирка на Движењето на отпорот.

По една акција, во бегство од нацистите, преку Шпанија, Вејк пребегнала во Велика Британија, каде што станала една од најважните координатори на британските специјалци и завршила шпионска обука. Таа имала и важна улога во операциите како денот Д. Ноќта на 29 февруари 1944 година била пратена во Франција да води 7.000 војници и да ги саботира нацистичките инсталации низ земјата.

На жената која покрај храброста, била и најголем украс во борбата против нацистите, светот и' се заблагодарил со многубројни медали во Обединетото Кралство, Франција, САД и, конечно, во Австралија, меѓу кои се и „Легија на честа“ и три „Воени крста“ во Франција и британскиот медал „Џорџ“.