Бунтот и грабежите се шират низ Британија

Во Лондон беше мирно, но затоа се беснееше во Манчестер, Ливерпул и Бирмингем

ЛОНДОН - Групи млади луѓе се судрија со полицијата во англиските градови и во помали места во текот на ноќта, но во Лондон, каде што се распоредени илјадници дополнителни полициски сили, главно, беше мирно по три турбулентни ноќи во кои млади луѓе практично без контрола беснееја во делови од главниот град. Манчестер и Ливерпул на северозапад и Бирмингем во централна Англија беа најмногу погодени од насилството во текот на ноќта, кое започна во северен Лондон во саботата, по протестот за полициското убиство на осомничено лице два дена претходно.

Во Бирмингем, полицијата започна истрага за убиство, бидејќи тројца муслимани загинаа кога беа прегазени од автомобил во тамошните безредија. Пријател на загинатите изјави за Радио Би-Би-Си дека тие биле дел од групата британски Азијци што ја заштитувале нивната област од ограбувачи по рамазанските молитви во џамија. „Автомобилот возеше кон нив, тоа беше ладнокрвно убиство“, рече пријателот.

Состојбата во Лондон беше, главно, мирна, а околу 16.000 полицајци - десет илјади повеќе отколку во понеделникот - се распоредени на улиците како израз на сила во квартовите каде што банди млади луѓе со качулки на главите ограбуваа продавници и палеа автомобили и згради претходните три ноќи. Стивен Кавана, заменик-помошник комесар на лондонската Метрополитен полиција, јави дека полицајците ќе бидат повторно распоредени и оваа ноќ.

Премиерот Дејвид Камерон, кој го прекина семејниот одмор во Италија за да се справи со кризата, требаше да претседава со вториот состанок на владиниот Комитет за кризи ЦОБРА и го свика парламентот, што ретко се случува да расправа за насилството.

Ограбувањето му покажа на светот грда слика на Лондон помалку од една година пред да биде домаќин на Олимписките игри во 2012 година, настан за кој официјални лица се надеваат дека ќе го прикаже градот во позитивна светлина. Во вторникот се оствари посетата на Меѓународниот олимписки комитет „како што беше планирано“, а организаторите од Лондон изјавија дека насилството нема да ги попречи подготовките за олимпијадата. Хаосот во Лондон и стравувањето од натамошни безредија доведоа до откажување на пријателскиот фудбалски натпревар Англија - Холандија и одложување на три клупски натпревари.

Додека силното полициско присуство во Лондон ги спречи сите освен неколку инциденти во главниот град, грабежи и насилство се случуваа во градовите и во помалите места во северниот и во западниот дел на Англија. Групи млади луѓе со качулки на главите се судрија со полицијата во Манчестер кршеа излози и ограбуваа продавници и запалија продавница за облека. Во Салфорд, учесниците во безредијата фрлаа цигли врз полицијата и палеа згради. Притоа беше нападнат камерман на Би-Би-Си. На телевизиските снимки беше прикажано како горат продавници и автомобили, а густ црн чад се издигнуваше над улиците.

„Овие луѓе немаат против што да протестираат - нема логика за неправда или каква било причина што доведе до тоа. Јасно и едноставно, тие се акти на криминално однесување, најголеми што сум ги видел“, рече Гери Шуен помошник на началникот на полицијата.

Во квартот Токстет во Ливерпул учесниците во нередите нападнаа две противпожарни возила и автомобилот на еден пожарникар, јави полицијата. Претходно околу 200 млади луѓе што фрлаа молотови коктели уништија и ограбија продавници, предизвикувајќи „безредие и штета“. Полицијата јави дека уапсила 113 луѓе во Манчестер и во Салфорд, а 50 во Ливерпул. Во Глочестер, западна Англија, осум противпожарни екипи се бореа со пожарот во голема напуштена зграда, беа запалени автомобили, а младите луѓе ја напаѓаа полицијата со камења и шишиња. Запалени автомобили и ограбени продавници имаше и во Вест Бромвич и Волверхемптон во централна Англија. Во Нотингем, банда млади луѓе запали полициска станица. Исто така, имаше нереди во Бирмингем и Лестер во Мидлендс и во Милтон Кејнс, северно од Лондон.

Во Лондон, железничкиот превоз во вторникот сообраќаше порано, продавниците беа затворени, а многу сопственици на продавници ги заштитуваа излозите. Бандите ограбуваа продавници, носеа облека, обувки и електронска техника, палеа автомобили, продавници и куќи, предизвикувајќи штета од десетици милиони фунти и, исто така, ја исмеваа полицијата. Премиерот Дејвид Камерон изјави за новинарите: „Јасно и едноставно, ова е криминал и мора да биде спречен. Луѓето не треба да се сомневаат дека ќе направиме се' што е потребно за да го вратиме редот на улиците во Британија“, изјави тој по првиот состанок на ЦОБРА во вторникот. (Ројтерс)