Поглед

Катар е уште далеку

Нина Нинеска-Фиданоска

Бадијала ли припадниците на македонската многубројна невработена популација трошеа часови и часови на интернет во потрага по симпатично работно место за себе во егзотичниот Катар? Бидејќи никој друг, туку самата македонска Влада им вети уредни договори за работа со престижните компании од богатата држава, за чие беспрекорно исполнување токму таа ќе гарантира. Арно ама, катарскиот сон некако тешко станува јаве за македонските сонувачи.

Иако Договорот за регулирање на вработувањата со Катар нашата држава уште одамна го ратификувала и ги завршила сите процедури што се барале од неа, нашите катарски пријатели тоа се' уште не го сториле. Кои се причините за ваквото „мало“ пролонгирање засега не им е познато на одговорните во нашето Министерство за труд и социјална политика, ниту, пак, даваат прецизен датум кога и Катарците ќе го исполнат својот дел од договорот, па нашите барани кадри непречено да можат да заминат во потрага по престижните катарски плати, кои се мерат со по неколку илјади долари. Но, од ресорот за труд и социјала се оптимисти дека „целата работа само што не е завршена“, па зошто истата ваква позитивна енергија да не ги заплисне и оние што од поодамна се надеваат дека специјални „скаути“ ќе дојдат овде и ќе ги регрутираат нашите потенцијални кадри, кои веднаш би заминале на печалба на посакуваната катарска територија?

А не се мали придобивките што би ги добиле од вакво државно гурбет-посредување. Загарантирана месечна плата, 48-часовна работа недела, платени патни трошоци, годишен одмор од најмалку три недели, бесплатно сместување за самци..., па дури и бесплатна ладна вода за пиење. Но, нели е подобро прво да се осигура договорот, па потоа да се ветува?