Мето Колоски: Да сe донесе закон за предавници

Претседателот на Обединетата македонска дијаспора (ОМД), Мето Колоски изјави дека Македонија треба да се донесе закон за предавници, со кој би се санкционирале тие што, на некој начин, им штетат на интересите на државата. Ваквото уникатно барање тој го изнесе во интервју за порталот „Macedonia news“ меѓудругото и како реакција на изјавите на лидерот на ДУИ Али Ахмети околу десетгодишнината на Рамковниот договор.

„ Ахмети направи предавство со самото тоа што ги нападна македонските војниц�� и полицијаци за време на кризата во 2001 година. Да се изврши тероризам врз својот сопствениот народ, тоа за мене е предавство. За жал, досега не видов никакво извинување за убиствата што се случија“, вели Колоски во интервјуто. На директното прашање, пак, дали на Македонија и' е потребен закон за предавство, тој одговори:

„Секако...Не знам зошто досега не беше прогласен... и Љубчо Георгиевски ставен во затвор зашто прогласи дека е Бугарин, зашто повеќе ја почитува и спроведува бугарската политика отколку македонската, или некој друг во државата, кој гледа да ја откорне Македонија однатре. Дефинитивно треба таков закон„.

Колоски, кој инаку важеше за еден од поумерените преставници на дијаспората, и кој до скоро беше фокусиран главно на остварување на македонските интереси во САД, со активностите во последно време станува се' повеќе дел од политичката сцена во Македонија.Тој е само еден од преставниците на иселениците кои преку разни портали во странство се обидуваат да влијаат, некогаш и многу грубо, на случувањата во земјава, а притоа се заштитени од географската и од политичка дистанца што им ја дава живеењето во друга држава. (Н.Р.)