Петкратниот светски првак Себастијан Леб победи во релито во Австралија, добивајќи ја тројната битка во неделата, со што ја намали разликата во вкупниот поредок од годинашниот шампионат. Французинот со својот „ситроен“ славеше со само 12,5 секунди подобро време од лидерот во првенството, Финецот Мико Хирвонен. Тимскиот колега на Леб, Шпанецот Дани Сордо, го освои третото место со заостанување од 4,6 сек. во однос на „фордот“ на Хирвонен откако во последниот натпреварувачки ден влезе со предност пред двајцата ривали од само десет стотинки.

Ова е шеста победа за Леб сезонава, која го доближи на само еден поен до Хирвонен во генералниот пласман на само две трки до крајот - во Шпанија и во Велика Британија наредниот месец. Хирвонен има 76 поени, а Леб 75.