И Баер (Л) ја растажи публиката во Гелзенкирхен

Шалке 04 загуби со 1:0 и не успеа да прослави победа ниту во петтиот меч на домашен терен во Бундеслигата оваа сезона

Фудбалерите на Шалке 04 не успеаја да прослават победа ниту во петтиот меч на домашен терен во Бундеслигата оваа сезона. Публиката во Гелзенкирхен овојпат ја растажи тимот на Баер Леверкузен на кој еден гол му беше доволен за три бода. Составот на Феликс и натаму останува со шест бода и на претпоследното место на табелата во период повеќе исполнет со лоши отколку со добри изданија иако во летниот период беа потрошени многу пари за засилувања. Стрелец на единствениот погодок на „Фелтинс арена“ беше Сидни Сем во 65 минута. Продолжението на натпреварот донесе уште неколку добри прилики за погодок на обете страни, но резултатот остана непроменет до последниот судиски свиреж.

Словенечкиот интернационалец Миливое Новаковиќ како едвај да го чекаше заминувањето на Звонимир Солдо од клупата на Келн за да покаже дека неправедно ја грееше клупата додека на нејзиниот чело беше хрватскиот тренерски стручњак. Келн славеше над Хамбургер со 3:2, сите три гола за домашната екипа беа дело на Новаковиќ (10, 29 и 84 минута) кој на најдобар начин му се заблагодари за довербата на привремениот кормилар, Франк Шафер, Петриќ и Сон поентираа за Хамбургер.

„Шафер е човек што има доверба во мене, но и во целата екипа. Затоа мора да му бидам благодарен. Со него остваривме две победи за кус период и тоа доволно зборува за нашиот колектив. Сметаме дека тој треба да остане на клупата како тренер“, рече по мечот Новаковиќ.

Десетиот бундеслигашки викенд мина без нерешени резултати. Покрај Баер Леверкузен и Келн, победи остварија уште Кајзерслаутерн над Борусија Менхенгладбах со 3:0, Волфсбург над Штутгарт со 2:0, Ајнтрахт Франкфурт против Сент Паули со 3:1, Нирнберг кај Вердер со 3:2 и Баерн Минхен против Фрајбург со 4:2.

Бундеслига, 10. коло



Резултати: Шалке 04 - Баер Леверкузен 0:1, Сент Паули - Ајнтрахт Франкфурт 1:3, Кајзерслаутерн - Борусија Менхенгладбах 3:0, Келн - Хамбургер 3:2, Волфсбург - Штутгарт 2:0, Вердер - Нирнберг 2:3, Баерн Минхен - Фрајбург 4:2. Вчера играа: Мајнц 05 - Борусија Дортмунд, Хофенхајм - Хановер 96.

Табела: Мајнц 05 24 (-1), Борусија Дортмунд 22 (-1), Баер Леверкузен 18, Ајнтрахт Франкфурт 16, Хановер 96 16 (-1), Хофенхајм 15 (-1), Баерн Минхен 15, Хамбургер 15, Нирнберг 15, Фрајбург 15, Вердер 14, Волфсбург 13, Сент Паули 13, Кајзерслаутерн 10, Келн 8, Штутгарт 7, Шалке 04 6, Борусија Менхнегладбах 6.