Нема веќе двојно оданочување со Германија

Германската влада го потпиша Договорот за ослободување од двојното оданочување со Македонија, соопшти вчера Претставништвото на Унијата на германските комори за индустрија и трговија во Скопје.

„Потпишувањето на овој Договор е уште едно олеснување во стоковната размена меѓу Македонија и Германија. Често ни се обраќаат компании кои се незадоволни поради тоа што треба два пати да платат данок и во Македонија и во Германија“, вели Михаел Шмидт, директор на германското стопанство за Србија, Македонија, Црна Гора, Албанија и Косово.

Договорот за избегнување двојно оданочување во однос на даноци на доход и имот меѓу владите на Македонија и Германија, беше ратификуван од македонското Собрание во 2007 година, но на негова ратификација од страна на надлежните германски институции се чекаше повеќе од три години. Со него се заменува германско-југословенскиот договор од 26 март 1987 година, кој важеше во досегашните германско-македонски односи. Договорот меѓу СФРЈ и СРГ за одбегнување на двојното оданочување потпишан во Бон на 26 март 1987, престана да важи во германско-македонските односи од 1 јануари годинава, од датумот на примена на Договорот склучен меѓу Македонија и Германија. Германија е еден од петте најважните трговски партнери на Македонија што лани беше и прв на ранг-листата. (МИА)