Црна листа на газди што не работат фер

Во Централниот регистар ќе се води еден вид црна листа, односно список на сите оние што имаат блокирани сметки, неколку пати отворале и затворале фирми, ги ставиле во стечај ,па отвориле нови и имаат кривични или прекршочни санкции за тоа. Сите тие нема да можат повторно да отворат нови фирми, најави министерот за економија Фатмир Бесими. „Очекуваме да се зголеми ефикасноста на стечајните процедури и зголемување на транспарентноста на целата постапка. Целта е да се намали можноста за шпекулации на пазарот, односно оние лица кои имаат отворени постапки како стечај и блокирани сметки, да се контролираат и да се штитат тие што се чесни учесници на пазарот. Довербата е нешто најсвето на пазарот, токму и во тоа е поентата, да направивме една софтверска алатка која ќе овозможи поголема доверба на сите оние што сакаат фер да работат на пазарот“, порача вчера Бесими.

Оваа црна листа ќе им овозможи на сите учесници на пазарот фер услови, што пак треба да придонесе да се зголеми доверба кај инвеститорите. Списокот ќе биде јавен и достапен за сите од февруари. Но, о��ие што ќе сакаат да ги дознаат ваквите играчи на пазарот, за тоа ќе мора да платат. „Сите оние што сакаат релевантни информации од релевантни институции ќе мора да платат, ќе се плаќа се додека не се овозможат услови за развој на нови алатки и регистри“, вели Ванчо Костадиновски, директор на Централен регистар. Оваа институција од вчера почна да нуди и информации за сите отворени стечаи, за движење на стечајната маса, за побарувањата од компаниите и граѓаните. Започнувањето со работата на втората фаза од едношалтерскиот систем опфаќа три компоненти, е-регистрација на фирми, е-стечај и дисквалификувани субјекти и е-регистрација на залог и лизинг. Проектот е реализиран во соработка со Светска банка, а изведуван од ЕРЦ од Ирска, ИРИС од Индија и меѓународниот конзорциум „Реактив“ од Македонија. (С.М.)