Претходен број

Полицијата го уапси Ламбе Арнаудов по 20 месеци потрага

За злоупотреба на еден милион евра, поранешниот директор на ЕСМ ќе одлежи четири години затвор

Поранешниот директор на ЕСМ, Ламбе Арнаудов, кој околу 20 месеци беше недостапен за полицијата, вчера е уапсен во неговиот дом во Охрид. Полицијата во 11 часот изутрината, по претходно распишана потерница, извршила проверка во неговата куќа, каде што е приведен и веднаш префрлен во затворот „Идризово“. Полицијата нема сознанија каде се криел поранешниот директор на ЕСМ во изминативе 20 месеци, период за кој се тврдеше дека им е недостапен на органите на прогонот.

Арнаудов во „Идризово“ ќе остане четири години, казна која му беше одредена од страна на судот поради злоупотреба на службената должност. Ексдиректорот на ЕСМ со правосилна пресуда е прогласен за виновен дека го оштетил претпријатието на чија раководна позиција бил, за околу еден милион евра.

„Арнаудов околу 14 часот со полициска асистенција беше спроведен во затворот „Идризово“, потврди директорот на затворот, Миле Младеновски.

По Арнаудов полицијата имаше распишано потерница, но 20 месеци не можеше да го пронајде, иако медиумите постојано известуваа дека тој повеќе пати бил виден на улиците на Скопје, но и во неговиот роден град Охрид.

Пред неколку месеци се' погласни беа гласиштата дека Арнаудов ќе биде „пронајден“ од полицијата веднаш по изборите за да ја одлежи четиригодишната казна затвор што му ја одреди судот. Арнаудов најпрво беше осуден на две години затвор, бидејќи правел штетни договори на сметка на фирмата, но Апелациониот суд двојно му ја зголеми казната. Тој требаше да се појави во „Идризово“ за издржување на казната на 30 ноември 2006 година. Кон почетокот на јануари 2007 година, откако стана јасно дека Арнаудов не планира сам да се појави во „Идризово“, Основниот суд Скопје 1 против него распиша потерница. Но, тој дваесет месеци беше недостапен за органите на прогонот, се' до вчера кога беше приведен во неговата куќа во Охрид, каде што се говори дека често престојувал.

Опозицијата во повеќе наврати ја критикуваше власта за селективност при ��псењата, при што случајот со Ламбе Арнаудов беше посочуван како еден на најеклатантните примери. Министерката за внатрешни работи, Гордана Јанкулоска, пак, изјавуваше дека МВР постапува исто по сите потерници и дека Арнаудов ќе биде приведен кога ќе се создадат услови за тоа. (Д.Т.)