На местото на бивша „Алумина“ ќе никне луксузен трговски центар
Центарот ќе го гради израелската компанија „Газит голуб“, а инвестицијата чини од 100 до 120 милиони евра; од вчерашниот прес
„Алумина“ имаше околу 700 вработени, кои од парите на продажбата се надеваат да си ги добијат платите
Александрија Стевковска
На местото на некогашната скопска фабрика за профили „Алумина“ ќе никне луксузен трговски центар. Изградбата на трговскиот центар ќе започне за три-четири месеци, а деновиве ќе стартува расчистувањето на теренот. Инвестицијата, која ќе вреди од 100 до 120 милиони евра и ќе отвори 100 работни места, ќе биде реализирана од страна на израелската компанија „Газит глоуб“. Таа го купи земјиштето на тендер за 22 милиона евра. Имотот на „Алумина“ од крајот на минатиот месец е пренесен во сопственост на израелската компанија.
„Ова претставува одлична бизнис-одлука на ’Газит глоуб‘. Во овој проект ќе инвестираме од 100 до 120 милиони евра, но може да се донесе одлука и за дополнителни инвестиции, со оглед на тоа дека очекуваме раст на овдешната економија“, изјави претседателот на израелската компанија Хајм Кацма на вчерашниот прес во Владата.
Според него, има можности за реализација и на други проекти за изградба на трговски и станбени комплекси во Скопје и во другите градови во Македонија. Тој ги повика и другите странски компании да вложуваат во Македонија, која, според него, е добро место за инвестирање.
Израелците преку овој бизнис веќе се присутни во повеќе земји во светот, како што се САД, Канада, Бразил и Индија, а од поблиската околина се присутни во Бугарија и во Турција. Тие не гледаат опасност во веќе постојната и растечка конкуренција во делот на трговијата и веруваат дека можат да се справат со конкуренцијата во овој контекст.
Реализацијата на проектот е започната од минатата година во март при првата средба на министерот Ташковиќ со претставници на израелската компанија, која од многуте можности што им биле претставени го одбрале објектот и земјиштето на „Алумина“. На петтиот тендер објавен за продажба на фабриката, израелската компанија понудила 20 проценти повеќе средства од почетната сума објавена со тендерот.
„Алумина“ беше осум години затворена и не можеше повеќе да работи особено со оглед на тоа што користеше скапа суровина од Црна Гора. Се потрудивме најдобро да го решиме проблемот со иднината на ’Алумина‘, со оглед на тоа дека досега правната ситуација го попречуваше тоа“, истакна Ташковиќ.
Средствата, како што информира министерот, се за исплата на плати на вработените, придонеси за пензиско и инвалидско осигурување, за здравствено осигурување, како и долгови спрема Управата за јавни приходи.
Според израелските медиуми во време кога „Газит глоуб“ го договараше влезот во земјава, тие планираат изградба на трговски центар со површина од 60.000 квадратни метри, а заедно со хотелот и зградата со канцелариски простор, објектите ќе достигнат 90.000 квадратни метри. Со ваквите деловни планови, наместо за производство, како во минатото, во иднина локацијата треба да послужи за изградба на уште еден услужен комплекс во земјава.
Според пазарната вредност, „Газит глоуб ЛТД“ е втора најголема компанија за неподвижен имот во Израел. Израелската фирма „Газит глоуб“, го купи некогашниот гигант за алуминиумски профили преку холандската фирма „Џи Недерландс“, чиј сопственик е Израелец, кој компанијата „Газит глоуб“ ја има регистрирано и во Холандија.
„Алумина“ имаше околу 700 вработени, кои очекуваат од парите на продажбата да бидат намирени нивните плати и придонеси. „Газит глоуб“, според тендерската документација, нема обврски да ја рестартира фабриката и да ги врати на работа вработените во „Алумина“. |
