Претходен број

Караманлис: Во Грција никогаш не постоело македонско малцинство

Жалам што во овој критичен момент на преговорите, ми го испративте писмото, вели грчкиот премиер

Во Грција не постои „македонско“ малцинство. Тоа никогаш и не постоело. Во овој контекст, какви било тврдења во однос на постоењето на такво малцинство се целосно неосновани, политички мотивирани и тие претставуваат непочитување на историската реалност во регионот. Што се однесува до какви било имотни прашања, секое лице може да ги искористи законските постапки за да се обрати до судовите, вклучително и до Судот за човекови права во Стразбур.

Овој исклучителен став е дел од одговорот на грчкиот премиер Костас Караманлис адресиран до македонскиот премиер Никола Груевски и неговото писмо каде што шефот на македонската Влада ја повикува Грција да го смени својот негаторски став спрема македонското малцинство во таа земја и да преземе соодветни чекори за решавање на реално постојните проблеми на една поголема група луѓе кои по Граѓанската војна во 1949 принудно биле протерани од своите домови во Егејска Македонија.

Писмото на Груевски предизвика бурна реакција на грчките политички партии, а цела измината недела „провокациите“ од Скопје, како што ги оквалификува грчкиот печат, беа ударна тема. Во стилот на познатото „едноумие“ по ова прашање, политиките партии побараа, а медиумите шпекулираа со можниот остар одговор на „скопјаните“ филувано со детали дека писмото на Груевски значи без малку крај на разговорите за името, а тајмингот на испраќањето – една недела пред одбележувањето на 60-годишнината од егзодусот на децата-бегалци од Егејска Македонија – дека е намерно темпиран и може да доведе до инциденти и сериозно влошување на односите.

„Господин премиере – вели Караманлис - вашето писмо не само што воопшто не оди во прилог на унапредувањето на преговорите и добрососедските односи со мојата земја туку и покренува одреден број непостојни и неаргументирани прашања кои особено негативно влијаат врз силните напори што ги презема Грција. Тоа, исто така, е насочено кон вмешување во домашните работи на една соседна земја и е спротивно на целите на преговорите што се во тек“.

Во писмото кое преку грчкото МНР уште завчера вечерта пристигна во Канцеларијата за врски на Република Грција, од каде што вчера беше доставено до кабинетот на Груевски, Караманлис потсетува дека „Грција и вашата земја се обврзаа на преговори во рамките на Обединетите нации во однос на прашањето за името кое „треба да се реши во интерес на одржувањето мирни и добрососедски односи во регионот“, како што е предвидено во Резолуцијата 817 на Советот за безбедност.

Во изминатите неколку недели, специјалниот пратеник на Обединетите нации, г. Метју Нимиц изнесе неколку идеи со кои преговорите би можеле да се придвижат нанапред. Жалам што токму во овој критичен момент во процесот на преговорите, вие одлучивте да ми го упатите писмото од 10 јули 2008 година“.

Грчкиот премиер потсетува дека уште од 1993 Грција ја покажувала својата добра волја под покровителство на ОН да се изнајде заемно прифатливо решение за прашањето со името, „при што ќе се земат предвид легитимните интереси и чувствителноста на нашите две земји“ и потсетува дека тоа е процес во рамките на мандатот на релевантните резолуции на Советот на безбедност. Но, истакнува Караманлис, ова исто така ја претставува желбата на сите земји кои се дел од евроатлантските и европските институции, како што беше јасно подвлечено на Самитот на НАТО во Букурешт и на Европскиот совет на ЕУ во Брисел.

Караманлис во писмото кое не содржи закани како што бараа некои од политичките лидери неделава, вели дека ја користи можноста да ја подвлече „цврстата заложба на Грција за унапредување на пријателските и добрите односи со сите соседни земји, особено со земјите од Западен Балкан и за создавање на неопходните услови кои на овие земји ќе им овозможат во блиска иднина да му се приклучат на евроатлантското и европското семејство“. Тој е убеден дека, како што вели, „времињата се изменети“ и дека иднината на балканските земји е во европските и евро-атлантските институции, а не во националистички методи од дамна изминати времиња кои мораат еднаш засекогаш да бидат оставени во историјата. Грција и натаму цврсто се залага да работи на постигнувањето на таа цел.

На крајот тој му сугерира на Груевски дека „историјата им суди на лидерите според тоа како се справуваат со предизвиците и ги исполнуваат своите одговорности. Многу ќе зависи од вашиот позитивен став и конструктивен дух“.

Според медиумите во Атина, копија од писмото до премиерот Груевски истовремено им била доставена и до генералниот секретар на ОН, на генералниот секретар на НАТО и на челниците на ЕУ. (Н.Р.)