Регулаторот ги изгоре граѓаните со поскапо парно за 60,35 отсто!

Покачувањето стартува од идниот месец и ќе важи до крајот на годинава

Деспина Трајковска

Парното греење поскапува и тоа за рекордни 60,35 проценти. Ова покачување ќе важи за најголемиот дел скопјани, односно за оние кои ги користат услугите на АД „Топлификација“. Корисниците, пак, на Топлификација „Скопје-Север“ ќе плаќаат поскапо греење за 30,25 отсто од досегашната цена. Ваквата одлука Регулаторната комисија за енергетика ја донесе на вчерашната подготвителна седница, која ќе ја потврди на седницата во понеделник

Граѓаните се шокирани од новите цени што ќе се пресметуваат од наредниот месец и ќе важат до крајот на годинава. Некои од нив сериозно размислуваат да ја откажат услугата на „Топлификација“ и веќе бараат алтернативни решенија. Ако досега, за стан од седумдесетина квадратни метри за парно се плаќало 2.200 денари, сега со новата цена затоплувањето на домот ќе чини без малку 3.500 денари. Односно, корисник на парно од АД „Топлификација“ наместо досегашните 27 денари за квадратен метар, во иднина ќе плаќа околу 44 денари за квадрат.

„Свесни сме дека одлуката за поскапувањето ќе предизвика негодувања кај граѓаните, но мора де се следат и почитуваат економските реалности. Во спротивно, ќе дојдеше до застој во работата на ‘Топлификација‘, а граѓаните ќе останеа без топлинска енергија. Сите треба да бидеме свесни дека високите цени на енергијата не се проблем само кај нас, туку воопшто во светот. Цената на горивата постојано расте, па нормално е да растат и цените за производство на топлинската енергија“, изјави вчера Славе Ивановски, претседател на Регулаторната комисија.

Тој објасни дека до конечниот процент на зголемување на цената на парното Комисијата стасала земајќи ги предвид поскапувањата на мазутот и природниот гас, кои се основни суровини за производство на топлинската енергија. Како што посочи Ивановски, цената на мазутот скокнала за цели 49 отсто, а на природниот гас за околу 20 проценти.

Разликата, пак, во процентот на поскапувањето меѓу двата испорачатела се должи на тоа што „Топлификација“ користи и гас и мазут, а „Скопје-Север“ само природен гас. И на двете покачувања на услугите влијаела и одлуката на Уставниот суд со која се поништи одлуката за ретроактивно важење на поскапувањето од 17,56 отсто, што беше усвоено речиси пред половина година. Од РКЕ вчера напомнаа дека од „Топлификација“ не биле задоволни од одобрениот процент на зголемување на цената. „Бараа повеќе, и тоа освен актуелните состојби на факторите кои влијаат на цената, дополнително посочија да се пресметаат и нивните лански загуби од 43 милиони денари, што ние како барање не го прифативме. Според финансиските извештаи, тие оствариле поголем приход од загубата и затоа ги одбивме“, посочија регулаторите.

Од „Топлификација“ вчера не сакаа да коментираат дали се задоволни од одлуката на комисијата. Накусо само рекоа дека нивните и математиките на РКЕ биле речиси блиски. Инаку, со последново поскапување сите корисници на парно, без оглед на тоа дали се корисници на АД „Топлификација“ или, пак, на Топлификација „Скопје-Север“, сега се изедначуваат.