Населението осиромаши, но не и политичарите

Бившиот премиер Љупчо Георгиевскиго однесе семејството на летување во Јапонија и во Јужна Кореја

Горан Адамовски

Поранешниот премиер Љупчо Георгиевски заедно со сопругата Снежана и синот Лав заминаа на годишен одмор. Како своја летна дестинација ги одбраа Јапонија и Јужна Кореја. Батериите за жешката политичка есен и уште понапорната изборна пролет, лидерот на ВМРО – Народна партија (ВМРО-НП) ќе ги полни на егзотичните дестинации, до каде само три авионски билети чинат колку една просечна годишна плата во Македонија.

Откако ја напушти премиерската функција и откако му заврши пратеничкиот мандат, јавноста нема информации со што се занимава поранешниот премиер и како заработува пари за сопствената егзистенција и живеачката на неговото семејство. Во развиените демократии, пак, за да се отстранат сомневањата за корупција на високи политички функционери, освен што детално се следат нивните банкарски сметки и извори на приходи за времето кога ја извршуваат функцијата, јавноста е запознаена и со професијата со која се занимаваат откако ќе ја напуштат функцијата.

Георгиевски, освен што неколку пати двосмислено кажа во јавноста дека има приватна фирма, не даде никаква друга информација со што се занимаваат тој и неговата сопруга Снежана, што очигледно им дозволува луксузен живот како што е одмор во Јапонија и Јужна Кореја.

Сопругата на Георгиевски, Снежана, во интервју за магазинот „Теа Модерна“ изјави дека оваа година таа и сопругот, заедно со нивниот син, ќе одат на одмор во Јапонија иво Јужна Кореја.

„Ќе летуваме во Јужна Кореја и во Јапонија. И Лав ќе дојде, ама предходно не' услови. Со Љупчо бевме ставени речиси пред свршен чин. Лав ни рече дека би сакал да ја види Јужна Кореја и доколку случајно решиме да одиме таму, можеби и би дошол. На суптилен начин не' убеди“, изјави Снежана Георгиевска во интервјуто.

Кризата што го погоди македонското население со сета сила, очигледно не е проблем за семејството на поранешниот македонски премиер, но посочената дестинација за одмор повлекува принципиелно прашање – што работат екс-премиерот и неговата сопруга, штом во тешката економска ситуација која ги наведе на штедење и многу други јавни личности од побогати земји, тие одбираат луксузни аранжмани за летен одмор. Овие прашања заслужуваат одговор.

Љупчо, Снежана и нивниот син Лав, кој е во тинејџерските години, приватно престојуваат на Далечниот Исток, потврдија вчера и од ВМРО-Народна партија. Отпатувале пред некој ден, таму ќе се задржат дваесетина дена, велат блиските соработници на Георгиевски. Како заминале, каде ќе престојуваат, колку ги чини ова патешествие, се само дел од прашањата што интригираат во ситуација кога земјава се соочува со поразителна сиромаштија.

Летови од Скопје за главниот град на Јапонија имаат речиси сите пог��леми авио-компании во земјава. Повратен билет во овој период од годината чини околу 1.300 евра. Можат да се користат и аеродромите во соседството и да се искомбинира најевтината варијанта, но поевтино од 1.150 евра тешко се наоѓа, а секако дополнителен трошок е да се стигне до Приштина или до Загреб, на пример. Дел од компаниите нудат попуст за три билети и за плаќање во готово. Повратен билет од Токио до Сеул во Јужна Кореја чини околу 500 американски долари.

Од Државната комисија за спречување на корупцијата велат дека откако ќе ја напуштат функцијата, политичарите не се должни да го пријавуват својот имот. Георгиевски никогаш не сакал да ја извршува таа обврска. Во 2008 година, при напуштање на пратеничката функција, тој во законскиот рок не достави Анкетен лист. Поради тоа, против него беа иницирани две постапки пред Управата за јавни приходи за испитување на имотот и имотната состојба, која се' уште не е завршена; како и прекршочна пријава до Основниот суд, која резултираше со пресуда, според која, Георгиевски е огласен за виновен и му е изречена глоба во износ од 500 евра. Надвор од законскиот рок, во септември 2008 година, тој, сепак, достави Анкетен лист по напуштање на функцијата пратеник.

„Во анкетниот лист за стапување на функцијата пратеник во 2006 година, како заеднички имот со сопругата пријавил два стана во Скопје (едниот од 100 м2, другиот од 200 м2), две ниви во Скопско (едната од четири, другата од три декари). Како имот на сопругата, пријавен е идеален дел од семејна куќа во Владимириво од 200 м2. Исто така, на име на сопругата е пријавен џип „Тојота‘ РАФ 4. Како заеднички имот се пријавени уметнички слики и девизна заштеда од 70.000 евра. Во анкетниот лист за напуштање на функцијата, пријавени се само две промени: на негово име куќа од 180 м2 како наследство во Делчево, и девизна заштеда од 80.000 евра, што значи зголемување од 10.000 евра во однос на претходно пријавената заштеда“, се наведува во соопштението од ДКСК како одговор на нашите прашања.

Во својата автобиографска книга, Георгиевски тврди дека потекнува од добростоечко семејство, бидејќи, како што вели, неговиот дедо и татко никогаш немале проблем со комунистичкиот систем.

Македонија е држава со седум илјади долари бруто домашен производ што ја сместува во рангот на најниско развиени држави а процентот на сиромаштија официјално изнесува 30, како и 261.322 невработени заклучно со јуни.

Георгиевски сега е бизнисмен

Освен политичар, Љупчо Георгиевски сега е и бизнисмен, велат неговите блиски соработници. Тие одбиваат во детали да зборуваат за „цивилниот живот“ на нивниот претседател, бидејќи, како што велат, политиката е таа што ги спојува и единствено нешто за што разговараат со него.

Бизнисот со градежништво е најраспостранет и добро му оди. Според непотврдени информации, тој работи со двајца партнери, бизнисот, наводно, е проширен и со осигурителна компанија, увоз на плочки, санитарии и други работи поврзани со градешништвото, а се зборува и за испорака на половни возила. Георгиевски е заминат на одмор, а неговите партиски колеги одбиваа да ги потврдат или демантираат ваквите гласишта.

„Приватник е, има фирми и голем број вработени“, е единствениот коментар на неговите соработници. (Г.А.)

ВМРО-НП: Фондот да обезбеди пари за операција на девојче

Стотици семејства секојдневно преку донации очајно се обидуваат да ги спасат животите на своите блиски. Само мал дел од парите кои Владата на ДПМНЕ ги изѕида во „Скопје 2014“ можеа да решат многу вакви или слични случаи и со тоа директно би ги промениле човечките судбини. Ова е ставот на ВМРО-Народна партија искажан на вчерашната прес-конференција во Скопје, во врска со барањето за донација од 13.800 евра за да се спаси животот на едногодишно девојче.

„Министре Тодоров, Ве прашуваме зошто Вие и Вашата Влада потрошивте 250.000 евра за само 3 врби и експресно потрошивте дополнителни 80.000 евра за да ја замените исушената врба со нова, а редовно одбивате да реагирате кога некому му се потребни финансиски средства за операција. Ваша уставна должност и законска обврска како министер за здравство е да се обидете да го спасите секој човечки живот без разлика на цената“, велат од партијата. ВМРО-НП бара Фондот за здравствено осигурување веднаш да обезбеди финансиски средства потребни за операција на малото девојче и на сите други кои во моментов не можат да се оперираат поради недостиг на финансиски средства.

Евроминистрите ќе штедат ова лето

Лидерите од земјите-членки на еврозоната оваа година се прилагодуваат на длабоката криза во која се наоѓа Европската монетарна унија и на острите мерки за скратување на буџетските трошоци, па нема да одат на летување во странство, како што тоа обично го практикуваа во годините на просперитет.

Според лондонски „Дејли телеграф“, дури и Ангела Меркел, канцеларот на Германија, најмоќната членка на зоната на еврото, нема да троши многу на своето овогодишно летување, не само поради штедењето, туку и за да им покаже на сите други во еврозоната дека ова „не е време за расфрлање со парите“. Таа својот двонеделен одмор го почнала со посета на германскиот музички фестивал во Бајрут, појавувајќи се во истата облека како и пред четири години, а потоа со сопругот ќе помине кусо време во италијанската алпска област Јужен Тирол.

Францускиот претседател ќе летува „некаде во Франција“, а побарал и сите министри да одат на одмор во некое од француските одморалишта. Премиерот Жан Марк-Ејро ќе се одмора во својата куќа во Бретања.

Италијанскиот премиер Марио Монти, исто така, ќе летува кусо време „некаде во Италија“, а во својата земја ќе одмора и неговиот португалски колега. За разлика од нив двајцата, премиерите на Шпанија и на Грција, нема воопшто да одат на одмор.

Претставник на Кабинетот на грчкиот премиер Андонис Самарас, за лондонскиот весник рекол дека ова лето нема да оди никаде на одмор, како што тоа им е наредено и на сите министри. Наместо летување, побарано е работното време за сите да почнува рано наутро.