ВМРО-ДПМНЕ води во анкетите пред СДСМ

Осум месеци пред локалните избори, се топи разликата меѓу вечните ривали и сега таа изнесува 6,5 проценти

Владејачката коалиција ВМРО-ДПМНЕ и ДУИ и во последната анкета на Институтот за демократија и МЦМС има повисок рејтинг во опозициските партии во македонскиот и во албанскиот кампус. Сепак, осум месеци пред локалните избори, последните резултати покажуваат дека се топи разликата меѓу политичките ривали ВМРО-ДПМНЕ и СДСМ и таа сега изнесува 6,5 проценти.

Според истражувањето, партијата на власт ВМРО-ДПМНЕ ужива повисок рејтинг во однос на опозициската СДСМ, 25,5 отсто наспроти 19 отсто од определените гласачи. Што се однесува до расположението на албанското гласачко тело, ДУИ е во предност во однос на ДПА со 11,1 спрема 6,6 отсто. Голем е процентот на граѓаните кои не сакаат јавно да дадат одговор на прашањето за кого би гласале ако утре се одржат избори. Речиси една третина од испитаниците, односно 32,4 отсто не сакаат да одговорат за која партија би гласале на следните избори.

Интересно е тоа што речиси една третина од граѓаните или 31,3 отсто излез гледаат во нова политичка опција за која би го дале својот глас. Но, уште поголем е процентот (49,7) на оние кои не би „експериментирале“ со нова политичка опција што евентуално би се појавила на политичката сцена. Ваквото расположение надвладува и кај двете најголеми етнички заедници во државава.

Истражувањето на Институтот за демократија „Societas Civilis“ - Скопје (ИДСЦС) и Македонскиот центар за меѓународна соработка (МЦМС) е спроведено во текот на овој месец. Станува збор за теренска анкета во домаќинствата која била спроведена од 19 до 26 јули на репрезентативен примерок од 1.600 испитаници. Популациската рамка на примерокот било население постаро од 18 години, а критериуми за репрезентативност биле пол, етничка припадност, возраст и место на живеење. Испитаниците одговарале на прашања за рејтинзите на политичките партии и предизборните здружувања меѓу политичките партии.

Една четвртина од испитанците очекуваат дека ВМРО-ДПМНЕ ќе победи на следните избори (25,1 проценти), додека победа на СДСМ очекуваат 15,2 проценти од вкупниот број испитанции.

Граѓаните во поголема мера се скептични дека предизборното коалицирање ќе и' донесе победа на опозицијата, така се изјасниле дури 51,5 отсто од анкетираните. Од друга страна, пак, 20,8 отсто од граѓаните очекуваат победа на опозицијата. Исто така, 56,2 проценти не ја одобруваат коалицијата меѓу Љупчо Георгиевски и Бранко Црвенковски, образложувајќи го тоа со недостиг на политички кредибилитет кај овие политичари. Помал дел или 18,4 отсто ја одобруваат коалицијата меѓу Георгиевски и Црвенковски, бидејќи сметаат дека власта треба да си замине по секоја цена. (Д.Т.)