Поглед

По автопат низ Балканот

Сања Наумовска

На Балканот секоја година се градат стотоци километри автопати, но Македонија, за жал, не е дел од тоа друштво. Инвестициите во инфраструктурата во нашата земја не се во преден план последниве години. Слабо ни оди вложувањето во патишта, иако градежната оператива не застана ниту за миг. На секој чекор има отворени градилишта, но ништо од тоа не е поврзано со подобрувањето на патната мрежа низ државава.

Според податоците од „Евростат“, Македонија во изминатите 20 години изградила 150 километри автопат. За разлика од нас Албанија, само за три години направила двојно повеќе, односно 300 километри нов модерен автопат. На инфраструктурата ударнички се работело и во Хрватска, Србија, Косово, Турција, Бугарија, Словенија и Романија. Во полоша состојба од нас во балканското опкружување се само Босна и Херцеговина, каде што се изградени само 71 километар автопат и Црна Гора, која во последниве десетина години не изградила ниту километар.

Како земја која зависи од сувоземниот транспорт на луѓе и стока, ваквите податоци навистина не ни одат во прилог. Јасно е дека инвестициите во инфраструктурата се големи, но очигледно се со надоволен интензитет. Двата Паневропски коридори 8 и 10, кои минуваат низ Македонија, се' уште не се целосно заокружени како автопат. За целосно издигнување на Коридорот 10 на ниво на автопат се чека на изградбата на делницата Демир Капија - Смоквица, со вкупна должина од 28 км. Коридорот 8, пак, со години се плетка во неуспешни тендери за концесионирање. Сега се најавува нов начин на финансирање, но конкретни проекти со прецизни тајминзи уште не сме виделе.

Очигледно е дека приоритетите ќе треба да се менуваат. И тоа во најскоро време ако не сакаме да останеме на дното на балканското друштво.